Tetovë, votojnë 99 të sëmurë dhe 62 të burgosur

99 persona të sëmurë apo të paaftë dhe 62 të burgosur në Burgun e Tetovës, sot e shfrytëzojnë të drejtën e tyre të votës. Sipas, Nazmi Dautit, nga Komisioni Komunal Zgjedhor i Tetovës deri në këto çaste gjithcka është duke shkuar mirë.

Materialet janë dorëzuar në kohë në burgun e Tetovës dhe procesi po rrjedh sipas ligjit. Ndërkohë, theksoi se po ashtu në kohë ka filluar edhe shpërndarja e materialeve nëpër gjithsej 117 vendvotime, ku nesër pritet të votojnë rreth 88 mijë votues të regjistruar në listën e votuesve.

“Në gjithsej 117 vend votime i gjithë materiali shtetëror për votime është shpërndarë. Ditën e sotme votojnë personat e sëmurë dhe të paaftë, të cilët kanë plotësuar kërkesë deri tek komisioni komunal i zgjedhjeve, ashtu siç e parasheh ligji shtatë ditë para zgjedhjeve. Nga 106 kërkesa, Komisioni komunal i zgjedhjeve ka pranuar 99-të, e sot do të realizojnë të drejtën e votës 99 persona të sëmurë dhe të paaftë, po ashtu sot votojnë edhe personat që janë me vuajtje të dënimit, në burgun e Tetovës, ku numri është 62, ku 28 janë nga qyteti i Tetovës, ndërsa të burgosurit tjerë janë nga komuant tjera. I gjithë procesi deri në këto momente po zhvillohet pa probleme.”- deklaroi Nazmi Dauti nga KSHZ- Tetovë.

Ndërkohë, procesi i votimit për personat e sëmurë apo me aftësi të kufizuara po shkon mirë dhe pa probleme edhe në komunat tjera rurale në Tetovë, si ajo e Bogovinës, Zhelinës, Tearcës, Bervenicës dhe Jogunovcës. (Visar Sadiku, TVM2)