Kuvendi i Kosovës pritet të mblidhet të dielën, zgjedhja e qeverisë së re është pika e vetme

 

“Në qoftë se ka marrëveshje, mund të mbahet seanca dhe mund të ketë qeveri. Në qoftë se s’ka marrëveshje, atëherë si presidente e vendit do t’i ftoj të gjitha partitë politike për të parë nëse ka mundësi që dikush ta krijojë shumicën, sepse mendoj që është përsëri herët të flasim për zgjedhjet e jashtëzakonshme, por ajo është një alternativë në qoftë se nuk krijohet shumica.”, thuhet në komunikatën e presidentes së Kosovës, Vjosa Osmani.

 

Ndërsa mediat e Kosovës raportojnë se ende nuk është zhvilluar ndonjë takim apo negociatë mes subjekteve politike, që do të mundësonin krijimin e një koalicioni qeverisës, pasi në zgjedhjet e shkurtit, LVV arriti të siguronte vetëm 48 mandate, nga 120 sa numëron Parlamenti. 

 

Kurti nuk iu përgjigj interesit të gazetarëve nëse ka siguruar votat për qeverinë e re. Në datën 11 tetor, Kurti u mandatua nga presidentja Vjosa Osmani për të krijuar ekzekutivin e ri. Nëse ai nuk arrin të marrë 61 votat e nevojshme në Kuvend, i takon presidentes të ndërmarrë hapin e radhës, që është emërimi i një mandatari tjetër për kryeministër. 

 

Sipas vendimit të vitit 2020 të Gjykatës Kushtetuese të Kosovës, mandatari i dytë për kryeministër mund të jetë edhe nga partia e dytë më e madhe, në këtë rast, Partia Demokratike e Kosovës. Nëse sërish nuk arrihet krijimi i një qeverie, presidentja shpall mbajtjen e zgjedhjeve të reja, të cilat duhet të mbahen brenda një periudhe 40 ditore.