Kuvendi i Kosovës, dështon zgjedhja e Qeverisë së re të Kosovës

 

“Zëvendëskryeministri i parë dhe Ministri i Jashtëm: Glauk Konjufca, Zëvendëskryeministrja dhe Ministrja e Drejtësisë: Donika Gërvalla, Ministri i Financave: Hekuran Murati, Ministri i Mbrojtjes: Ejup Maqedonci, Ministri i Punëve të Brendshme: Xhelal Sveçla, Ministri i Shëndetësisë: Arben Vitia, Ministri i Arsimit: Avni Zogiani, Ministri e Tregtisë: Mimosa Kusari.”, u shpreh mandatari për formimin e Qeverisë, Albin Kurti.

 

Por kjo përbërje e Qeverisë dhe kjo përpjekje e Kurtit, u kritikua ashpër nga partitë më të mëdha opozitare si: PDK, LDK, AAK.

 

“Koha e fjalëve ka marrë fund, koha është ta verifikoni atë që e keni thënë gjithmonë se keni arrit shumicën e re parlamentare, andaj tani u bëjmë ftesë ta dëshmoni këtë përgjegjësi, duke hedhur në votim, menjëherë dhe sa më parë vendimin e Qeverisë që sapo e propozuat.”, u shpreh kryetari i PDK-së, Memli Krasniqi.

 

“LDK nuk sheh arsye për debat, na keni thënë numrat i kemi, urdhëroni mateni vetën me numra demokratik nga kjo legjislatur. Çdo arsyetim tjetër është dërgesë drejt zgjedhjeve të reja të jashtëzakonshme.”, u shpreh kryetari i LDK-së, Lumnir Abdixhiku.

 

“I nderuar deputet që I paraqite këtu në emrin e shumicës, më habiti pak arsyeja e luftës hibride, për mendimin tim, ti je produkt i luftës hibride të armiqve tanë. Lufta hibride e hanë atë i cili e ka ushqyer atë luftë, e tash të ka ardhur radha edhe ty, e të uroj sukses.”, u shpreh kryetar i AAK-së, Ramush Haradinaj.

 

Dhe pasi u hedh në votim, Kryetari I Parlamentit Dimal Basha, konstatoi se numrat nuk mjaftojnë, dhe se përgjegjësia kalon tek Presidentja.

 

“Përgjegjësia tani kalon sërisht tek Presidentja, e cila pas konsultimeve me subjektet politike, dhe brenda një afati prej 10 ditësh, ka mundësi të emëroj kandidatin tjetër për Kryeministër sipas të njëjtës procedura.”, u shpreh kryetari i kuvendit, Dimal Basha.

 

Kjo ishte hera e parë që një mandatar për kryeministër dështon në votim. Në të gjitha proceset e deritashme të formimit të qeverisë, që nga viti 2001, mandatarët janë zgjedhur me shumicë votash me të parën në propozim.