Armëpushimi në Gazë nën presion, Netanjahu kërcënon: Do të veproj më fuqishëm

 

“Nëse Hamasi vazhdon ta shkelë armëpushimin, do të përballet me sulme të fuqishme, si ato të pardjeshme dhe të djeshme. Ne vendosim dhe veprojmë kur është e nevojshme për të eliminuar rrezikun e menjëhershëm ndaj forcave tona. Në fund, Hamasi do të çarmatoset dhe Gaza do të demilitarizohet. Nëse këtë e bëjnë forcat e huaja, aq më mirë. Nëse jo, do ta bëjmë ne.”, - theksoi kryeministri i Izraelit, Benjamin Netanjahu.

 

 

Hamasi u përgjigj se nuk e ka thyer asnjëherë armëpushimin. Sipas tyre, Izraeli kërkon pretekst për të vrarë njerëz të pafajshëm. Ndërsa Izraeli kërcënon me sulme të mëtejshme, përpjekjet humanitare për të ndihmuar civilët në Gazë vazhdojnë të pengohen nga veprimet e këtij shteti, duke e vënë armëpushimin dhe shpëtimin e njerëzve në rrezik, thonë nga OKB.

 

“Zgjerimi i operacioneve humanitare në Gazë po pengohet nga kufizimet e vendosura nga Izraeli, i cili detyron konvojët të kalojnë rrugë të ngushta dhe të dëmtuara. Pavarësisht përpjekjeve të OKB-së dhe partnerëve, shpërndarja e ushqimit dhe karburantit mbetet e kufizuar dhe shumë njerëz nuk marrin ndihmën e nevojshme. Mbi gjysmë milioni njerëz kanë marrë ushqim, por kjo mbulon vetëm 35% të nevojave mujore. Kufizimet e Izraelit pengojnë edhe furnizimin me shërbime mjekësore dhe energji për operacionet kritike.”, - u shpreh zëdhënësi i OKB-së, Farhan Haq.

 

Pavarësisht sulmeve dhe incidenteve në Gazë, si Hamasi ashtu edhe Izraeli pohojnë se mbeten të përkushtuar ndaj marrëveshjes për armëpushim të arritur me ndërmjetësimin e ShBA-së. Ndërkohë, mijëra hebrenj ortodoksë protestuan mbrëmë në Jerusalem kundër rekrutimit të të rinjve nga komuniteti i tyre në shërbimin ushtarak.