Armëpushim i brishtë në Gazë, Netanjahu kërcënon se do të godasë sërish

 

“Nëse dikush përpiqet të dëmtojë forcat tona, ne do t’i godasim fuqishëm, ashtu edhe organizatat e tyre për t’u mbrojtur dhe jemi të vendosur në këtë. Ne i njoftojmë miqtë tanë amerikanë, por nuk kërkojmë leje nga ta. Çarmatimi i Hamasit dhe demilitarizimi i Rripit të Gazës janë parimet që ndjekim dhe që janë dakorduar mes meje dhe presidentit Tramp dhe në këtë kornizë veprojmë.”, - deklaroi kryeministri i Izraelit, Benjamin Netanjahu.

 

Ndërkohë, presidenti i Turqisë, Rexhep Taip Erdogan, akuzoi Izraelin si shkaktarin kryesor për prishjen e paqes.

 

“Gjatë dy viteve të fundit, Gaza ka qenë dëshmitare e një prej gjenocideve më të egra dhe barbare të këtij shekulli. Më shumë se shtatëdhjetë mijë palestinezë, kryesisht gra dhe fëmijë, janë masakruar nga forcat izraelite të pushtimit, ndërsa njëqind e shtatëdhjetë mijë vëllezër e motra tona janë plagosur. Gaza, e cila tani është kthyer në një grumbull gjigant rrënojash, ende mban trupa dëshmorësh që nuk janë gjetur. Izraeli që e beri këtë krim, vazhdon të pengojë paqen në Lindjen e Mesme duke vazhduar sulmet.”, - theksoi presidenti i Turqisë, Rexhep Taip Erdogan.

 

Ndërkohë ministrat e Jashtëm të shtatë vendeve: Emiratet e Bashkuara Arabe, Indonezia, Katari, Pakistani, Arabia Saudite dhe Jordania, që morën pjesë në takimin për Gazën me Donald Trampin u mblodhën përsëri në Stamboll nën udhëheqjen e Turqisë. Samiti, i kryesuar nga Hakan Fidan, u fokusua në arritjen e një armëpushimi të qëndrueshëm në Gazë dhe në shtimin e ndihmës humanitare për civilët. Pavarësisht armëpushimit të vendosur në letër, Izraeli ka vazhduar sulmet në Gazë, duke vrarë qindra civilë, që nga 10 tetori.