Mamdani u zgjodh kryetar i Nju Jorkut, kundërshtar i ashpër i politikave të Trampit

 

“Në fund të fundit, nëse ka dikush që mund t’i tregojë një kombi të tradhtuar nga Donald Tramp se si ta mposhtë atë, është pikërisht qyteti që e ka nxjerrë në pah atë. Nëse ka një mënyrë për të tmerruar një despot, është duke prishur kushtet që e lejojnë atë të grumbullojë pushtet. Me këtë mënyrë nuk ndalim vetëm Trampin, por edhe despotin e radhës.”, - deklaroi kryebashkiaku i ri i Nju Jorkut, Zohran Mamdani.

 

Shefi i Shtëpisë së Bardhë u kundërpërgjigj shkurt në rrjetin e tij social me fjalët “dhe kështu fillon”. Para pak kohësh Trampi e quajti Mamdanin "komunist" duke paralajmëruar se qyteti do të përballet me një "katastrofë totale ekonomike dhe sociale" nën administrimin e Mamdanit. Ndërsa kandidati për kryetar bashkie të Nju Jorkut, Andrju Kuomo, mbajti fjalim pas humbjes së tij në këto zgjedhje.

 

“Ndonëse humbëm, kjo fushatë ishte beteja e duhur për t’u zhvilluar dhe jam krenar për atë që bëmë së bashku. Kjo fushatë kishte për qëllim të sfidonte filozofinë që po formëson Partinë Demokratike, të ardhmen e këtij qyteti dhe të ardhmen e këtij vendi.”, - theksoi kandidati humbës për kryetar bashkie të Nju Jorkut, Andrju Kuomo. 

 

Kandidatët republikanë u mundën edhe në zgjedhjet për guvernator të Nju Xhersit dhe Virginia, ku fituan demokratët Mikie Sherrill dhe Abigail Spanberger. Goditje për presidentin Tramp pati edhe në Kalifornia, ku rreth 64% e votuesve mbështetën propozimin për ristrukturimin e ndarjes së zonave elektorale për 52 vendet e këtij shteti federal në Dhomën e Përfaqësuesve të Kongresit amerikan, me qëllimin për të dërguar më shumë ligjvënës demokratë dhe për të balancuar të njëjtat ndryshime të bëra më parë në Florida dhe Teksas, ku shumicën e kanë republikanët.