Maqedoni

Maqedonia dhe Bullgaria, marrëveshje për ndërtimin e tunelit hekurudhor

06.11.2025 14:23

Maqedonia dhe Bullgaria nënshkruan marrëveshjen për ndërtimin dhe funksionalizimin e tunelit hekurudhor ndërkufitar të Korridorit 8...

Maqedonia dhe Bullgaria nënshkruan marrëveshjen për ndërtimin dhe funksionalizimin e tunelit hekurudhor ndërkufitar të Korridorit 8, me të cilin do të lidhen Shkupi dhe Sofja. Dokumenti, i cili i përcakton aktivitetet dhe detyrimet e të dyja shteteve, u nënshkrua në stacionin hekurudhor “Gjyushevo” nga zëvendëskryeministri dhe ministri i transportit, Aleksandar Nikolloski, dhe homologu i tij bullgar, Grozdan Karaxhov, në prani të përfaqësuesve nga KE, NATO, SHBA, bankat ndërkombëtare dhe ambasadorja amerikane, Angela Ageler. Tuneli, me një gjatësi prej 2.4 kilometrash, do të ndahet pothuajse në mënyrë të barabartë mes dy vendeve. Nikolloski theksoi se me këtë marrëveshje realizohet një ëndërr shumëvjeçare për lidhje hekurudhore mes Shkupit dhe Sofjes, ndërsa Karaxhovi theksoi se po ringjallet një projekt më shumë se një shekull i vjetër.

 
“Marrëveshja është ëndërr e gjeneratave në të dyja anët e kufirit, diçka për të cilën kemi lexuar, diçka që na është mësuar kur ishim fëmijë se të dy shtetet, dy kryeqytetet, Sofja dhe Shkupi, duhet të lidhen me një lidhje hekurudhore.”, - deklaroi ministri i Transportit, Aleksandar Nikollovski.
 
Ministri i Transportit të Republikës së Bullgarisë, Grozdan Karaxhov, tha se kjo ditë është jashtëzakonisht e rëndësishme, sepse po përmbushim një ëndërr të shumë gjeneratave.
 
“Po hapim, po rinovojmë një hekurudhë që është më shumë se 100-vjeçare. Patëm nderin me Nikollovskin ta realizonim këtë projekt.”, - theksoi ministri i Transportit të Bullgarisë, Grozdan Karaxhov. 
 
Valentina Superti, drejtoreshë e Drejtorisë për Ballkanin Perëndimor të KE-së, porositi se marrëveshja është shumë e rëndësishme për të dy shtetet, por edhe për të gjithë rajonin.
 
“BE-ja mbështet bashkëpunimin midis dy vendeve dhe siguron fonde për implementimin e projektit. Ndërtimi i tunelit do të sjellë përfitime sociale dhe ekonomike për rajonin.”, - u shpreh drejtoresha e Drejtorisë për Ballkanin Perëndimor të KE-së, Valentina Superti.
 
Korridori 8 si linjë transporti që lidh Detin Adriatik me Detin e Zi - u theksua në ceremoninë - për shtetin do të thotë një lidhje e drejtpërdrejtë dhe qasje në dy dete, gjë që është e rëndësishme për një konkurrueshmëri më të madhe të ekonomisë. Me ndërtimin e hekurudhës, e cila filloi në vitin 1994 dhe konsiderohet një projekt me interes kombëtar për shtetin, duhet të krijohen kushte për transport më të shpejtë dhe më të lirë të mallrave dhe pasagjerëve, për të inkurajuar zhvillimin e tregtisë, turizmit dhe investimeve në rajon. Gjithashtu theksohet si i rëndësishëm, sepse Korridori 8 është një korridor strategjik i NATO-s. Vlerësimet e instituteve janë se ndërtimi i tij do të rrisë transportin e mallrave me mbi 30 për qind, ndërsa komunikacionin e pasagjerëve për 20-25 për qind në vitet e para pas ndërtimit.
 
ARMEND MURSELI