Ukraina nis prodhimin e dronëve interceptues, Zelenski: Dronët godasin me sukses objektivat ruse

 

“Ukraina duhet të bëjë gjithçka për t’u siguruar që asnjë sulm rus të mos mbetet i pandëshkuar. Armatimi ynë, sanksionet ndërkombëtare dhe presioni politik ndaj Rusisë, të gjitha këto funksionojnë dhe do të funksionojnë edhe më shumë.”, u shpreh presidenti i Ukrainës, Volodimir Zelenski.

 

Moska nuk planifikon të sulmojë NATO-në, por do t’i përgjigjet me të gjitha mjetet e mundshme çdo sulmi që do të vinte nga Aleanca, paralajmëroi zëdhënësja e Ministrisë së Jashtme ruse.

 

“Nëse strategëve të NATO-së u shkon në mendje një ide e tillë e çmendur, të sulmojnë Rusinë, ata nuk duhet të dyshojnë se ne do të përgjigjemi me të gjitha mjetet që kemi në dispozicion. Jemi të përgatitur për çdo zhvillim të mundshëm.”, u shpreh zëdhënësja e MPJ-së ruse, Maria Zaharova.

 

Edhe Kombet e Bashkuara dënuan sulmet, duke bërë thirrje për ndalim të menjëhershëm të luftimeve. Sipas Misionit të Monitorimit të të Drejtave të Njeriut në Ukrainë, numri i viktimave civile gjatë dhjetë muajve të parë të këtij viti tashmë ka tejkaluar shifrën e tërë vitit të kaluar.

 

“Pas sulmeve më të fundit, organizatat humanitare , duke përfshirë agjencitë e OKB-së, organizatat vendase dhe ndërkombëtare, u mobilizuan shpejt për të ndihmuar njerëzit e prekur në Kiev dhe në gjithë Ukrainën. Po sigurohen vakte të ngrohta, materiale për strehim emergjent, batanije dhe produkte higjienike, si edhe mbështetje psikosociale.”, u shpreh zëdhënësi i OKB-së, Stefan Dujarriç.

 

Sulmi ndaj Kievit ishte më i forti në pothuajse tre javët e fundit. Gjashtë persona u vranë dhe mbi 30 u plagosën, përfshirë fëmijë. Forcat ukrainase u kundërpërgjigjën me raketa lundruese me rreze të gjatë veprimi kundër objektivave në Rusi. Ndërkohë, fati i Samitit të Paqes të iniciuar nga presidenti amerikan mbetet ende i pasigurt.