Izraeli sulmon sërish Gazën, Hamasi - ShBA-së: Ushtroni presion ndaj Tel Avivit
20.11.2025 13:03
Të paktën 28 palestinezë, mes tyre 9 fëmijë...
Të paktën 28 palestinezë, mes tyre 9 fëmijë, u vranë të mërkurën nga sulmet ajrore izraelite në disa zona të Gazës, duke shënuar përshkallëzimin më të fundit të dhunës që nga hyrja në fuqi e armëpushimit mes Izraelit dhe Hamasit.
Ushtria izraelite deklaroi se goditi objektiva të Hamasit në Kan Junis, pasi “disa militantë” kishin hapur zjarr ndaj trupave izraelite. Sipas IDF-së, incidenti përbën shkelje të marrëveshjes së armëpushimit.
Hamasi e mohoi këtë version dhe e cilësoi sulmin “përshkallëzim të rrezikshëm”, duke i bërë thirrje ShBA-së të ushtrojë presion ndaj Izraelit për të respektuar armëpushimin. Izraeli zhvilloi gjithashtu sulme në Libanin jugor, duke shënjestruar, sipas tij, depo armësh të Hezbollahut. Një ditë më parë, një tjetër goditje izraelite në një kamp refugjatësh palestinez në Liban shkaktoi 13 të vdekur.
Pavarësisht tre përshkallëzimeve të mëdha që nga tetori, armëpushimi mes Izraelit dhe Hamasit ka vijuar të mbahet, ndërsa procesi i shkëmbimit të pengjeve dhe të burgosurve ka hyrë në fazën e parë. Hamasi ka dorëzuar të gjithë pengjet e gjallë dhe trupat e shumicës së viktimave. Që nga nisja e luftës pas sulmit të 7 tetorit 2023, mbi 69 mijë palestinezë janë vrarë, pjesa më e madhe gra dhe fëmijë, sipas autoriteteve shëndetësore në Gazë.