Presidentja e Kosovës ka shpërndarë Kuvendin, caktoi datën e zgjedhjeve më 28 dhjetor

“Qëndrimi ynë si PDK është se kemi kërkuar që data e mbajtjes së zgjedhjeve të jetë data 21. Arsyet pse data 21, është për shkak se ne kemi pasur një shtyrje të vazhdueshme, një bllokadë në krijimin e institucioneve, që bie barrë e partisë që ka fituar numrin më të madh të votave dhe vendi ka nevojë të ketë sa më shpejt institucione.”, - deklaroi kryetari i PDK-së, Bedri Hamza.

 

“Duke qenë se ka shumë akumulime të temave buxhetore në respekt të qytetarëve të vendit për kohën e humbur kemi propozuar që të jetë dita e zgjedhjeve parlamentare më 21 dhjetor.”, - theksoi kryetari i AAK-së, Ramush Haradinaj.

 

“Presim që më 21 dhjetor të shpallen zgjedhjet. Janë vetëm dy data 21 dhe 28 dhjetor, të shohim se cila do të vendoset.”, - u shpreh kryetari i Nismës, Fatmir Limaj.

 

Por, Faton Peci nga Guxo, preferon që data e mbajtjes së zgjedhjeve të jetë 28 dhjetori.

 

“Ne mendojmë se data më optimale mes datës 21 dhe 28, më e favorshmja, më e përshtatshmja për qytetarin, për mërgatën, për institucionin për menaxhim më të mirë është data 28 dhjetor.”, - deklaroi kryetari i GUXO, Faton Peci.

 

Përbërja e nëntë e Kuvendit të Kosovës, e cila tanimë është shpërndarë nga presidentja, brenda nëntë muajsh u përball me vonesa të shumta për konstituimin e Kuvendit. Pas shumë përpjekjesh dhe parashtresash në Gjykatën Kushtetuese, u arrit të zgjidhet kryetari i Kuvendit, Dimal Basha, por jo edhe qeveria e re, pasi fillimisht mandatari Albin Kurti, e më pas edhe Glauk Konjufca, nuk arritën të sigurojnë 61 vota të deputetëve, duke e çuar kështu vendin në zgjedhje të parakohshme. Para shpërndarjes së Kuvendit, presidentja ftoi partitë politike që t’i krijojnë komisionet kuvendore dhe ta miratojnë propozim-buxhetin për vitin 2026 dhe marrëveshjet ndërkombëtare, por partitë politike nuk patën gatishmëri për një gjë të tillë.