Afganistan, sulm në një hotel në qendër të Kabulit

Mediat ndërkombëtare raportojnë se të shtëna dhe shpërthime vazhduan të dëgjohen edhe pas më shumë se dy orëve nga nisja e sulmit. 

 

“Kishte shkëmbim zjarri të fuqishëm mes forcave afgane dhe shpërthime të fuqishme sikur gjuanin me raketahedhës. Nuk vumë gjumë në sy gjithë natën”- deklaroi dëshmitar okular, Haji Abdul Vali.

 

Ministria e Brendshme e Afganistanit thotë se objektivi i autorëve ishte hoteli, i cili frekuentohet kryesisht nga persona të huaj dhe që ka qenë shënjestër e talebanëve që prej 2009-ës.

 

Javët e fundit, sulmet e talebanëve ndaj shtetasve të huaj në Afganistan janë shtuar ndjeshëm.

 

Vetëm dy javë më parë, të paktën 14 persona u vranë para fillimit të një koncerti në Kabul.

 

Deri tani asnjë grup nuk ka marrë përgjegjësinë për sulmin, megjithëse autoritetet vendase shprehen se ai është kryer nga talebanët.