Bastisje në Shkup, Kumanovë e Tetovë, të dyshuarit kanë keqpërdorur detyrën zyrtare

Prokuroria Themelore Publike e Shkupit ka nisur procedurë kundër pesë personave, për shkak të dyshimit të bazuar se si bashkëkryerës kanë kryer një vepër penale - Shpërdorim i detyrës dhe autorizimit zyrtar sipas nenit 353 paragrafi 5 në lidhje me paragrafin 4 dhe paragrafin 1 të Kodit Penal.

Të dyshuarit kanë keqpërdorur detyrën e tyre zyrtare, duke mos e kryer pozitën e tyre zyrtare, edhe pse ishin të detyruar të informonin Qeverinë e RMV-së për gjendjen faktike në Ndërmarrjen Publike për punë të Berzave "Agroberza" - Shkup, përkatësisht se është konstatuar një mungesë e pabazuar e grurit dhe elbit tregtar (gjatë periudhës 2019-2021).

Ata kanë paraqitur të dhëna dhe informacione të pasakta. Me këtë veprim, personat vepruan në kundërshtim me Ligjin për Rezervat e Mallrave. Njëri nga të dyshuarit, bashkëpunëtor i jashtëm, ekspert i punësuar përmes Byrosë së Vlerësimit, ka vepruar në kundërshtim me dispozitat e Ligjit për Vlerësim dhe në kundërshtim me marrëveshjen e shërbimit të lidhur midis të pandehurit dhe Byrosë së Ekspertizës Ligjore, duke përgatitur një raport ekspertize në të cilin ka futur të dhëna të rreme, duke mos marrë parasysh të gjitha të dhënat dhe të gjithë dokumentacionin nga Agjencia e Rezervave të Mallrave - Shkup dhe NP "Agroberza".

Raporti i ekspertizës iu bashkëngjit informacionit për Qeverinë dhe u pranua nga Qeveria, me ç’rast Agjencia e Rezervave të Mallrave - Shkup u detyrua të shlyente 1.500 tonë grurë komercial dhe 500 tonë elb për ushqim për kafshë, me një vlerë totale prej 29.112.000 denarë ose 473.365 euro (në kohën e shlyerjes me çmimet me të cilat u blenë gruri dhe elbi në vitin 2022, vlera e të njëjtit ishte 48.000.000 denarë ose 780.487 euro), vlerë e cila paraqet dëm për Buxhetin e RSM-së.

Duke pasur parasysh se bëhet fjalë për një krim që ndiqet në procedurë të shkurtuar, prokurori publik i paraqiti një propozim gjyqtarit të procedurës paraprake për përcaktimin e masave paraprake - sekuestrimin e dokumenteve të udhëtimit dhe paraqitjen në gjykatë për të gjithë të dyshuarit. (Fatlum Aqifi, TVM2)