Kuvend, reforma thelbësore në rrugën drejt BE-së

 

“Nëse vazhdojmë kështu dhe kjo ishte pjesë e diskutimit në Këshillin Kombëtar në përbërjen e kaluar, nuk jam i sigurt, ndoshta Bashkimi Evropian do të na kthejë përsëri në nivelin e skriningut. Nuk duhet të jetë i vetmi kusht zgjidhja e problemit bilateral me një nga fqinjët, sepse nuk jemi të përgatitur. Nuk ka asnjë përparim, veçanërisht në përgatitjet për hapjen e klasterëve, sidomos të parë.”, - deklaroi kryetari i Këshillit Kombëtar për Integrim Evropian, Venko Filipçe.

 

Edhe zëvendëskryetari i Komisionit për Çështje Evropiane, Igor Zdravkovski, theksoi se nuk duhet humbur kohë aspak në zbatimin e reformave.

 

“Reformat duhet të vazhdojnë, sepse çdo vonesë ose devijim nga reformat evropiane do të na çojë në një rrugë pa dalje dhe do të thotë vetëm humbje kohe dhe energjie.”, - theksoi zëvendëskryetari i Komisionit për Çështje Evropiane, Igor Zdravkovski.

 

Kryetari i Kuvendit, Afrim Gashi, theksoi se asnjë çështje bilaterale nuk duhet të bëhet pengesë për përparimin drejt BE-së, duke shtuar se shembujt e Shqipërisë dhe Malit të Zi tregojnë se procesi është real dhe i arritshëm.

 

“Asnjë çështje bilaterale nuk duhet të pengojë rrugën tonë drejt BE-së. Ne mbetemi të gatshëm për dialog parimor me të gjithë fqinjët. Përparimi i Shqipërisë dhe Malit të Zi tregon se politika e zgjerimit është aktive dhe rajoni mund të ecë përpara; për ne kjo është motivim, jo presion.”, - u shpreh kryetari i Kuvendit, Afrim Gashi.

 

Ambasadorja e Holandës, Uzem Zanel, dhe ambasadorja e Sllovakisë, Iveta Hricova, theksuan domosdoshmërinë e reformave, duke kujtuar se vendi duhet të miratojë ndryshimet kushtetuese për të hapur kapitujt e negociatave për anëtarësim në BE.

 

“Është shumë me rëndësi gjithashtu të fillohet me zbatimin e reformave të nevojshme në sundimin e së drejtës, luftën kundër korrupsionit dhe reformat në administratën publike.”, - deklaroi ambasadorja e Holandës, Uzlem Zanel. 

 

“Ne fuqishëm ju mbështesim dhe ofrojmë mbështetje jo vetëm teknike dhe financiare, por edhe përvoja që kemi fituar në rrugën tonë drejt BE-së.”, - theksoi ambasadorja e Sllovakisë, Iveta Hricova. 

 

Konventa Kombëtare u mbajt në Kuvend, ku u diskutua për sfidat rajonale në rrugën drejt Bashkimit Evropian, me pjesëmarrjen e deputetëve, ambasadorëve, ekspertëve të drejtësisë dhe përfaqësuesve akademikë nga rajoni.