ShBA, u plagosën dy ushtarë të gardës, u pezulluan kërkesat për imigracionin nga afganët

 

"Tani duhet të rishqyrtojmë çdo të huaj që ka hyrë në vendin tonë nga Afganistani nën udhëheqjen e Bajdenit dhe duhet të marrim të gjitha masat e nevojshme për të siguruar largimin e çdo të huaji nga çdo vend që nuk i përket këtu ose nuk i sjell përfitim vendit tonë. Nëse ata nuk mund ta duan vendin tonë, ne nuk i duam.", - deklaroi presidenti i ShBA-së, Donald Tramp.

 

Dy pjesëtarët e Gardës Kombëtare që u qëlluan pranë Shtëpisë së Bardhë janë në gjendje kritike. Ndërsa autori është arrestuar. 

 

“Brenda pak çastesh, forcat e tjera të rendit mbërritën dhe ndihmuan në arrestimin e tij. Aktualisht, siç u përmend, anëtarët e Gardës po trajtohen në një spital lokal dhe janë në gjendje të rëndë shëndetësore.”, - theksoi zëvendësshefi i Policisë, Xhef Karroll.  

 

Sekretari amerikan i Luftës, Pete Hegseth, për sigurinë e komunitetit ka urdhëruar vendosjen e 500 pjesëtarëve të tjerë të Gardës Kombëtare në Uashington.

 

“Do ta sigurojmë kryeqytetin tonë, qytetet tona. Do t’i kërkoj sekretarit të Ushtrisë dhe Gardës Kombëtare të shtojmë edhe 500 gardistë në Uashington. Kjo vetëm do ta forcojë vendosmërinë tonë për ta bërë qytetin të sigurt dhe të bukur. Rënia e kriminalitetit dhe sigurisë ka qenë historike. Por, nëse kriminelët duan të kryejnë akte të tilla dhune ndaj pjesëtarëve më të mirë të Amerikës, ne nuk do ta lejojmë më.”, - u shpreh sekretari amerikan i luftës, Pet Hegset.

 

Dhjetëra mijëra afganë hynë në ShBA pas tërheqjes së vitit 2021 nën programet speciale të imigracionit. I dyshuari, Rahmanullah Lakamal nga Afganistani, aplikoi për azil në vitin 2024 dhe kërkesa e tij u miratua këtë vit.