Helmimi i nxënësve në Sh. F. “Dimo Haxhi Dimov”, vazhdon verifikimi i shkaktarit të helmimit

 

“Sektori për kontroll sanitar ka marrë 4 mostra nga dy lokacione (klasë dhe kuzhinë),  nga të cilat dy për analizë fiziko–kimike dhe dy për analizë mikrobiologjike. Nga rezultatet e marra, të gjitha mostrat fiziko–kimike dhe mikrobiologjike përputhen me Rregulloren për kërkesat për sigurinë dhe cilësinë e ujit për pije (Gazeta Zyrtare e RM nr. 183/18),  dhe konstatojmë se uji në SHFK “Dimo Haxhi Dimov” në Komunën e Karposhit është i rregullt nga ana sanitare dhe mund të përdoret pa asnjë pengesë.”, - kanë njoftuar nga Ndërmarrja Publike “Ujësjellës dhe Kanalizim” – Shkup.

 

Nga Instituti i Shëndetit Publik sot në konferencën për shtyp njoftuan mbi analizën e mostrave të marra gjatë inspektimit të datës 26 nëntor.  Uji i  marrë nga 6 rubinetat, deri tani mikro-biologjikisht është i kënaqshëm, por sipas protokolleve duhet të pritet dhe një ditë, që rezultatet të jenë të sigurta. 

 

Nga dy materialet  e siguruara nga Klinika e Fëmijëve, njëri nga fëmijët është pozitiv në Norovirus, virus i cili deklarojnë se  mund të japë pasqyrë kimike të ngjashme me atë të shqetësimeve të stomakut, dhe është virus që përhapet lehtësisht dhe qëndron në sipërfaqe. Procesi i verifikimit të shkaqeve do të vijojë gjatë ditës së nesërme. 

 

“Qumështi Musli dhe kroasanët tani për tani, në aspekt mikrobiologjik i përmbushin kushtet. Deri në ora 16:00 do të  ketë rezultate edhe për musakën. Nga sipërfaqet e punës së kuzhinës, nga rubinetat deri te enët në të cilat është konsumuar ushqimi, mund të them se nga 9 sipërfaqet e analizuara, 3 janë pozitive, pozitive janë 2 rubinetat nga dy klasat dhe rubineta e kuzhinës. Nga këto sipërfaqe janë gjetur baktere nga grupi Enterobakteriace, baktere gram negative, të cilat mund të japin simptomatologji të ngjashme me atë që tregon pasqyra klinike e fëmijëve të helmuar dhe dëshmon për mungesë të higjienës.”, - thonë nga Instituti i Shëndetit Publik.

 

Edhe një nxënës është hospitalizuar mbrëmë në Klinikën për Fëmijë, ndërsa  6  të tjerë janë  paraqitur në ambulantë  me simptoma më të lehta dhe të njëjtët  nuk janë hospitalizuar, ka njoftuar sot në linjë telefonike drejtori i Klinikës për Fëmijë, Rexhep Memeti.  

 

“Këto ditë ne kemi pranuar gjithsej 7 fëmijë me simptoma të ngjashme, sa i përket dyshimeve për helmim me ushqim. Bëhet fjalë për fëmijë të cilët vijnë nga e njëjta shkollë. Kanë marrë trajtimin e duhur dhe janë në gjendje stabile shëndetësore, 3 nga të cilët sot janë lëshuar për trajtim në shtëpi.”, - deklaroi drejtori i Klinikës për Fëmijë, Rexhep Memeti. 

 

Kryeministri i vendit bëri thirrje që të mos bëhen gjykime dhe drama mediatike, duke demantuar lajmet se djali i tij është në gjendje të rëndë shëndetësore. Ai bëri thirrje që të priten rezultatet zyrtare të inspektimeve. 

 

“Të lëmë që institucionet të inspektojnë dhe të vërtetojnë shkaqet, a ka ardhur helmimi si pasojë e ushqimit apo ndonjë faktori tjetër, siç jam i informuar unë. Agjencia për Ushqim dhe Veterinari po i bëjnë inspektimet e duhura, të presim dhe të mos japim gjykime.”, - theksoi kryeministri i Maqedonisë së Veriut, Hristijan Mickoski.

 

Nga Instituti i Shëndetit Publik u bënë thirrje prindërve të fëmijëve të hospitalizuar dhe atyre që kanë shfaqur simptoma të  dorëzojnë materiale në Institutin e Shëndetit Publik sot deri në përfundim të ditës dhe gjatë ditës së nesërme, në mënyrë që t’i ndihmojnë procesit të verifikimit të shkaqeve të helmimit.