Kujdes, prej nesër fillon funksionimi i sistemit “Safe City”!

Nga nesër do të vendoset në funksion sistemi “Safe City”. Një gjë të tillë që kohë më parë kishte paralajmëruar edhe Ministri i Brendshëm, Pançe Toshkovski. Ky sistem fillimisht do të funksionoj në Qytetin e Shkupit, Tetovës dhe Kumanovës, ndërsa në gjithë teritorin e vendit  pritet që të vihet në funksion deri në mesin e vitit 2026-të.

Kjo do të thotë se shoferët tani për tani do të marrin vetëm paralajmërime, pa gjobë, kjo pasi sistemi në tre qytetet e lartëpërmendura do të zbatohet plotësisht nga janari i vitit 2026.

Ndryshe, çdo pronar i një automjeti, shkelja e të cilit do të dokumentohet përmes sistemit “Safe City”, do të marrë një njoftim me SMS dhe email me një link ku mund të shkarkojë raportin dhe urdhërin e pagesës.

Nga momenti i marrjes, ka një afat prej tetë ditësh për të paguar gjysmën e gjobës.

Pas skadimit, shuma duhet të paguhet e plotë brenda tetë ditëve të ardhshme, përpara se të fillojë procedura e mbledhjes me forcë.

Gjobat mund të paguhen edhe në mënyrë elektronike, dhe sistemi do të njoftojë menjëherë Ministrinë e Brendshme se gjoba është paguar.