Fituesi i Eurovisionit rikthen trofeun, proteston kundër pjesëmarrjes së Izraelit

Këngëtari zviceran dhe fituesi i Eurovision 2024, Nemo, ka njoftuar se po kthen trofeun e fituar, si protestë ndaj pjesëmarrjes së Izraelit në edicionin e vitit të ardhshëm.

26-vjeçari, fituesi i parë jobinar i konkursit, tha se ekziston “një konflikt i qartë” midis ideve të Eurovisionit për “unitet, përfshirje dhe dinjitet për të gjithë” dhe vendimit për të lejuar Izraelin të garojë.

Nemo theksoi: “Nuk bëhet fjalë për individë apo artistë. Konkursi është përdorur në mënyrë të përsëritur për të zbutur imazhin e një shteti të akuzuar për shkelje të rënda, ndërsa EBU insistonte se Eurovisioni është ‘jo-politik’. Kur vende të tëra tërhiqen për shkak të kësaj kontradikte, duhet të kuptohet se diçka nuk shkon. Për këtë arsye kam vendosur të dërgoj trofeun tim në selinë e EBU-së në Gjenevë.”.

Por transmetuesi izraelit Kan ka mbështetur vendimin për të mbajtur Izraelin në konkurs, duke mohuar ndërhyrje politike.

Presidenti izraelit, Isak Herzog, tha se Izraeli “meriton të përfaqësohet në çdo skenë në botë”.

Edhe  gjashtë muaj deri në Eurovision 2026, 34 vende pritet të marrin pjesë, megjithatë disa ende nuk kanë konfirmuar pjesëmarrjen e tyre.