Përplasje ShBA - Venezuelë në Karaibe

“Administrata e Trampit zbaton politikat e sanksioneve të presidentit të ShBA-së. Ne nuk do të qëndrojmë duarkryq duke parë si anijet e sanksionuara lundrojnë nëpër dete me naftë të tregut të zi, të ardhurat e së cilës ushqejnë narkoterrorizmin e regjimeve të paligjshme dhe të rrezikshme në mbarë botën.”, - deklaroi zëdhënësja e Shtëpisë së Bardhë, Karolin Leavit.

 

Nga Shtëpia e Bardhë thonë se Trampi nuk do të shqetësohej aspak nëse presidenti rus Putin do t’i ofronte mbështetje homologut të tij venezuelian. 

 

Maduro e quajti ShBA-në “Pirate të Karaibeve” dhe përmendi se ka zhvilluar një bisedë telefonike me kreun e Kremlinit.

 

“Kryen një akt absolutisht kriminal dhe të paligjshëm. Një rrëmbim dhe grabitje, si pirate të Karaibeve, të një anijeje private civile tregtare, një anije paqësore. Ajo u sulmua. Gati kishte arritur Oqeanin Atlantik. Nuk ishte në ujërat pranë Venezuelës. Ishte shumë më në veri të Trinidad dhe Tobagos, drejt ishullit Grenada, pothuajse në Atlantik.”, - theksoi presidenti i Venezuelës, Nikollas Maduro.

 

Për zhvillimet e fundit në Karaibe reaguan edhe autoritetet në Kolumbi. Ministria e Jashtme kolumbiane deklaroi se vendi është i gatshëm ta pranojë Maduron, nëse ai largohet nga pushteti në Venezuelë.

 

"Karaibet janë plot me popujt e vetë Karaibeve dhe kanë shumë mënyra politike dhe ekonomike të organizimit. Nuk ka ujëra ndërkombëtare në Karaibe. Ose raketat bien, ose raketat lëshohen nga ujëra që nuk u përkasin atyre që i lëshojnë. Kjo quhet pushtim. Ne tashmë jemi sulmuar.”, - u shpreh presidenti i Kolumbisë, Gustavo Petro.

 

Kohët e fundit ShBA-ja ka shtuar praninë e tyre ushtarake në Detin e Karaibeve. Trampi pretendon se Venezuela fut lëndë narkotike në ShBA. Nga ana tjetër, vendi latinoamerikan, i cili ka disa nga rezervat më të mëdha të naftës në botë, akuzon Uashingtonin se përpiqet të vendosë kontroll mbi burimet e tij dhe të vjedhë naftën. (Farije Dauti - Bakiu, TVM2)