MPB, në Negotinë u gjet i varrosur trupi i një gruaje

 

Më 9 dhjetor, djali i viktimës kishte raportuar se më 7 dhjetor në kamerat e sigurisë ishte parë nëna e tij duke u detyruar të hipte në automjetin “Fiat” të të dyshuarit, dhe që nga ajo ditë nuk ishte e arritshme në telefon.

 

Ai gjithashtu kishte raportuar se natën mes 6 dhe 7 dhjetorit, vrasësi kishte hyrë në shtëpinë e nënës së tij dhe nga dhoma e tij ishin marrë para.

 

I dyshuari, i arrestuar të enjten, kishte dhënë deklaratë të rreme në polici, por pas kontrollit të listës së thirrjeve u konstatua se kontakti i fundit i viktimës ka qenë pikërisht me të më 7 dhjetor. Kundër banorit të Komunës së Vrapçishtit është ngritur kallëzim penal për vrasje.

 

“Zyrtarët policorë nga zyra e jashtme për punë kriminalistike në Gostivar, në prani të prokurorit publik, kryen këqyrje në vendin në territorin e fshatit Negotinë, ku u gjet trupi i H.A. Me urdhër të prokurorit publik, trupi iu nënshtrua autopsisë.”, thuhet në njoftimin e MPB-së.

 

Për të dyshuarin është caktuar masa e ndalimit të shkurtër prej 48 orësh për sigurimin e provave. Një person tjetër është mbajtur ndërkohë që po kryhen verifikime. Me urdhër të Prokurorit Publik po ndërmerren veprime për zbardhjen e plotë të rastit, njoftojnë nga Prokuroria.