Ndotja e lartë e ajrit në Shkup, Qytetarët: Të merren masa nga autoritetet

 

“Nuk kam dal prej shtëpisë gjatë vikendit. Tash kam dalë pas tre ditëve.”, - tha një qytetar.

 

“Të gjithë dalin me vetura, thuajse secila shtëpi i ka nga dy e tri vetura dhe këtu është problem edhe tek ajri që është i ndotur.”, - tha një qytetar tjetër.

 

“Më pengon, si nuk më pengon ajri i ndotur!? Ky ajër ndikon tek pleqtë dhe tek fëmijët edhe më shumë si rriten në këtë ajër të ndotur.”, - u shpreh një qytetar.

 

Sipas ekologëve, edhe përskaj infrastrukturës, fabrikave në kryeqytet, ajrin e ndotur e shkaktojnë edhe veturat, andaj apelojnë që qytetarët më shumë të voziten me transport publik dhe gjendja me ajrin do të jetë më e mirë. Mirëpo problem është edhe se nuk ka linja të rregullta të autobusëve dhe qytetarët patjetër e kanë të marrin veturat e tyre.

 

“Pra, alternativat që kanë qytetarët tanë janë gazi, energjia elektrike, kështu që nafta është tashmë në qytetet tona, pothuajse duhet të jetë e fikur, por ende përdoret. Veturat janë ndotës të mëdhenj të ajrit jo vetëm nga benzina, por edhe nga rrotat. Megjithatë ky është standardi. Nga ana tjetër shumë qytetarë shfrytëzojnë veturat e tyre, pasi që transporti publik nuk funksionon siç duhet. Përndryshe 20 deri në 30 për qind e veturave do të pakësohen.”, - theksoi ekologu, Jovan Mazganski.

 

Ndotja e lartë e ajrit i ka mbushur edhe spitalet me pacientë, ku problem më të madh u shkakton të sëmurëve kronikë dhe fëmijëve. Nga UNICEF-i rekomandojnë që kur është ajri i ndotur të anulohen aktivitetet në ambiente të hapura, të mbahen mbyllur dyert dhe dritaret e shtëpive dhe shkollave.