Këshilli i Prokurorëve Publikë zgjodhi Topallova Isajllovskën u.d. - kryeprokuror

 

 

“Prokurorin publik republikan e zgjedh Kuvendi me propozim të Qeverisë. Në kësi situata, në bazë të ligjit parashihet që kur një prokurori publik i mbaron mandati ose jep dorëheqje, në këtë rast kur kolegu dha dorëheqje dhe Kuvendi e konstatoi dorëheqjen e kolegut,  ne jemi  të obliguar ligjërisht që të ketë kontinuitet të punës së Prokurorisë Publike Republikane dhe të zgjedhim ushtrues detyre – prokuror publik të Republikës së Maqedonisë së Veriut.”, - deklaroi kryetari i Këshillit të Prokurorëve Publikë, Bashkim Besimi. 

 

“Anita Topallova Isajllovska, e cila në kontinuitet ka qenë zëvendëse edhe në Prokurorinë Publike Republikane - Ljupço Jolevskit, një prej zëvendësve të Marko Zvërlevskit. Në kontinuitet dhjetë vite ka qenë zëvendëse. E dinë këtë funksion dhe mendoj se për të nuk do të paraqesë problem që për disa muaj ta ushtrojë funksionin, jo vetëm për të, por për tërë Prokurorinë.”, - theksoi anëtarja e Këshillit të Prokurorëve, Keti Petkova.

 

Anita Topallova Isajllovska vjen në këtë pozitë, pasi kryeprokurori Ljupço Kocevski dha dorëheqje nga detyra para se Kuvendi ta shkarkonte në seancën e po të njëjtës ditë. Kocevski ka shpjeguar se nga detyra po ik me krenari, por i zhgënjyer për mosrespektimin e parimeve mbi të cilat duhet të shtrihet shteti ligjor. Topollova Isajllovska do ta mbajë detyrën deri në zgjedhjen e një prokurori të ri publik shtetëror, por jo më gjatë se gjashtë muaj.