Trump: SHBA-ja ka “kapur” Maduron pas sulmeve të gjera

Pas akuzave dhe kundërakuzave të vazhdueshme mes SHBA-së dhe Venezuelës, Shtetet e Bashkuara kanë nisur sulme ajrore në Venezuelë, duke përfshirë kryeqytetin e saj Karakas dhe objektet ushtarake.

Banorët raportuan një seri shpërthimesh dhe fluturimesh të avionëve në nivel të ulët, duke ndërprerë energjinë elektrike në disa pjesë të qytetit.

Porti kryesor u godit gjithashtu. Në vend është shpallur gjendje e jashtëzakonshme.

"Dëgjuam aeroplanë që fluturonin dhe disa shpërthime, të paktën një duzinë. Tani që kam dalë jashtë shoh tym kudo, mban erë kreolini". – tha Enrique, banor i Karakasit.

Presidenti amerikan Trump pretendoi në mediat sociale se gjatë operacionit, Presidenti Maduro dhe gruaja e tij u kapën dhe u dëbuan nga vendi.

"Shtetet e Bashkuara kanë kryer me sukses një sulm të madh ndaj Venezuelës dhe udhëheqësit të saj, Presidentit Nicolas Maduro, i cili së bashku me gruan e tij, u kap dhe u dëbua nga vendi. Ky operacion u krye në bashkëpunim me forcat e rendit të SHBA-së". – tha Presidenti i SHBA-ve, Donald Trump.

Edhe pse opozita në Venezuelë pretendon se kjo ishte një marrëveshje, Qeveria e dënoi me forcë agresionin ushtarak dhe akuzoi Shtetet e Bashkuara për një sulm barbar dhe flagrant.

Ministri i Mbrojtjes njoftoi se operacionet për përcaktimin e viktimave dhe të plagosurve ishin duke u zhvilluar, duke theksuar se sulmi nuk ishte një luftë kundër narkoterrorizmit, por synonte ndryshimin e regjimit në vend.

Ai protestoi para bashkësisë ndërkombëtare dhe bëri thirrje për unitet dhe rezistencë.

"Përballë këtij sulmi tinëzar dhe frikacak që kërcënon paqen dhe stabilitetin e rajonit, ne ngremë protestën më të fortë të mundshme para bashkësisë ndërkombëtare dhe të gjitha organizatave shumëpalëshe, duke kërkuar dënimin e qeverisë amerikane për shkeljen flagrante të Kartës së OKB-së dhe të drejtës ndërkombëtare. Ky pushtim përfaqëson zemërimin më të madh që ka vuajtur vendi, i cili korrespondon me lakminë e pangopur për burimet tona strategjike.” – tha Ministri i Mbrojtjes së Venezuelës, Vladimir Padrino Lopez.

Maduro tha mbrëmë në një intervistë me shërbimin shtetëror se ishte i hapur për bisedime me SHBA-në mbi trafikun e drogës, naftën dhe migracionin, por pavarësisht diplomacisë së ofruar, ngjarjet kulmuan pas disa muajsh paralajmërimesh nga Uashingtoni në Karakas dhe akuzave të drejtpërdrejta nga Trump se Maduro përdor të ardhurat nga nafta për të financuar trafikun e drogës. Ky është përshkallëzimi më i madh ushtarak në rajon që nga Lufta e Ftohtë. (Fitim Kryeziu, TVM2)