Ka përfunduar identifikimi i viktimave të zjarrit në Kran-Montana, 9 janari është shpallur ditë zie

 

“Ekziston një trishtim i madh. Por, nuk duhet t’i harrojmë të gjithë ata që janë plagosur dhe të gjitha familjet që do të duhet të jetojnë me këtë dhimbje, si dhe të gjithë të rinjtë tanë. Dua vetëm të them se duhet të kujdesemi për të rinjtë tanë, të mos i harrojmë, sepse ata janë e ardhmja jonë. Është e rëndësishme të jemi të lidhur me njëri-tjetrin, sepse të gjithë jemi prindër; këta janë fëmijët tanë. Kaluam shumë kohë duke u përpjekur të kuptonim nëse njerëzit që njihnim, fëmijët, shokët e fëmijëve tanë, fëmijët e miqve tanë, ishin mirë.”, - deklaroi banorja e Kran-Montanës, Keti Premër.

 

Hetimet për zjarrin janë përqendruar në cilësinë e shkumës akustike në bar, për të cilën dyshohet se ka shkaktuar përhapjen vdekjeprurëse të flakëve. Autoritetet kanë hapur procedurë penale ndaj menaxherëve të barit, Xhesika dhe Zhak Moreti, të akuzuar për vrasje, lëndime trupore dhe shkaktim zjarri nga pakujdesia. Autoritetet zvicerane e kanë shpallur të premten ditë zie kombëtare, me kambanat e kishave që do të bien në orën 14:00, ndërsa do të fillojnë edhe ceremonitë mortore për viktimat.