Zyrtari i OKB-së: Sulmi i SHBA-ve në Venezuelë cenon një parim themelor të së drejtës ndërkombëtare

Një zëdhënës i Komisionerit të Lartë të OKB-së për të Drejtat e Njeriut, Volker Türk, ka deklaruar se është “e qartë” që operacioni ushtarak i SHBA-ve për të kapur presidentin Nicolás Maduro dhe gruan e tij gjatë fundjavës “cenoi një parim themelor të së drejtës ndërkombëtare”.

 

Në një deklaratë, zëdhënësi tha se Türk është “thellësisht i shqetësuar” për “situatën në Venezuelë”, e cila ka shkaktuar frikë tek shumë venezuelianë, ndërsa presidente në detyrë, Delcy Rodríguez, fillon të qeverisë dukshëm nën mbikëqyrjen e Uashingtonit, ndërkohë që presidenti Trump ka premtuar të marrë nën kontroll industrinë e naftës së Venezuelës me ndihmën e kompanive më të mëdha amerikane të naftës.

 

Zëdhënësi i OKB-së sqaroi më tej: Është e qartë se operacioni cenoi një parim themelor të së drejtës ndërkombëtare, që shtetet nuk duhet të kërcënojnë ose të përdorin forcë kundër integritetit territorial ose pavarësisë politike të ndonjë shteti.

 

SHBA-të kanë justifikuar ndërhyrjen e saj duke u mbështetur në regjistrin e gjatë dhe të tmerrshëm të shkeljeve të të drejtave të njeriut nga qeveria venezueliane, por zbatimi i përgjegjësisë për këto shkelje nuk mund të arrihet përmes një ndërhyrjeje ushtarake të njëanshme në shkelje të së drejtës ndërkombëtare. Populli i Venezuelës meriton llogaridhënie përmes një procesi të drejtë, i fokusuar tek viktimat.

 

Sipas raportimeve të vazhdueshme të Zyrës së OKB-së për të Drejtat e Njeriut, situata në Venezuelë ka qenë e rënduar për gati një dekadë, me të drejtat e qytetarëve që janë shkelur gjatë gjithë kësaj kohe. Ka shqetësim se destabilizimi aktual dhe militarizimi i mëtejshëm i vendit si pasojë e ndërhyrjes së SHBA-ve vetëm do ta përkeqësojë situatën.