Botë
Mosmarrëveshja për Grenlandën, Trampi këmbëngul në pushtimin e Grenlandës
15.01.2026 11:40
Danimarka ka paralajmëruar për një “mosmarrëveshje themelore” me Shtetet e Bashkuara pas bisedimeve në Shtëpinë e Bardhë mbi Grenlandën....
Danimarka ka paralajmëruar për një “mosmarrëveshje themelore” me Shtetet e Bashkuara pas bisedimeve në Shtëpinë e Bardhë mbi Grenlandën. Ministri i Jashtëm danez, Lars Loke Rasmusen, tha se takimi me zëvendëspresidentin JD Vance dhe sekretarin e shtetit, Marko Rubio, ishte konstruktiv, por theksoi se këmbëngulja e presidentit Donald Tramp për marrjen ose “pushtimin” e Grenlandës është e papranueshme.
“Presidenti i ShBA-së, Tramp, po këmbëngulte në pushtimin e Grenlandës, gjë që ishte krejtësisht e papranueshme. E bëmë shumë, shumë të qartë se kjo nuk është në interes të Danimarkës.", tha ai.
Trampi përsëriti interesin e tij për të blerë ishullin e pasur me burime, një pozicion që ka tronditur aleatët në të gjithë Evropën dhe ka nxitur tensione me NATO-n. Takimi njëorësh midis ShBA-së, Danimarkës dhe Grenlandës nuk arriti të sjellë një përparim të madh, megjithëse të gjitha palët ranë dakord të ngrinin një grup pune të nivelit të lartë për të diskutuar të ardhmen e territorit autonom danez. Danimarka dhe Grenlanda janë të hapura për bashkëpunim më të madh me ShBA-në, përfshirë praninë ushtarake, por kundërshtojnë çdo ide për marrjen e territorit.
Ndërkohë, disa vende evropiane, përfshirë Suedinë, Gjermaninë, Francën dhe Mbretërinë e Bashkuar, shprehën mbështetje për Grenlandën dhe Danimarkën mes rritjes së tensioneve gjeopolitike në Arktik. Sondazhet tregojnë se shumica e banorëve të Grenlandës dhe amerikanëve kundërshtojnë kalimin e ishullit nën kontrollin e ShBA-së.