Manipulim votash, kërkesë për paraburgim ndaj 11 të dyshuarve

 

“Deri në këto momente Gjykata Themelore në Prizren ka pranuar katër kërkesa për caktimin e masës së paraburgimit ndaj 11 personave dhe jemi ende në pritje të pranimit të kërkesave nga Prokuroria Themelore në Prizren”, tha Marcel Lekaj zëdhënës i Gjykatës Themelore në Prizren. 

 

Seancat dëgjimore kanë filluar që nga ora 14. Sipas tij, Gjykata ka formuar një grup punues ku janë caktuar 4 gjyqtarë kujdestarë për të pranuar kërkesat për caktim të masave të sigurisë, bashkëpunëtorë profesional dhe staf administrativ mbështetës që do të jenë sot e nesër në kohë të kujdestarisë për pranimin e kërkesave, trajtimin e tyre brenda afatit kohor.

 

Kryeministri në detyrë i Kosovës, Albin Kurti, ka bërë thirrje për hetim gjithëpërfshirës dhe ndëshkim për personat e dyshuar për manipulim të votave brenda partive politike në zgjedhjet e parakohshme parlamentare të 28 dhjetorit.

 

“Komisionerë e individë, që në mënyrë klandestine, janë përfshirë në manipulime votash brenda subjekteve politike duke dëmtuar kolegë e subjekte politike nuk kanë amnisti.”, shkruan Kurti.