LSM në protestë, kërkohet pagë minimale 600 euro

 

“Nuk do t’ju lusim, do të luftojmë”, ishte slogani para Kuvendit nga qytetarët që ndodheshin aty. Kryetari i LSM-së, Sllobodan Trendafilov theksoi se deputetët nuk duhet të luajnë me djersën dhe mundin e punëtorëve, nga taksat e të cilëve ata marrin pagë.

 

“Do të mbledhim 10 mijë nënshkrime dhe do të kërkojmë që pagat e deputetëve të ulen me 80%, paga minimale të jetë 600 euro, ndërsa pagat e tjera të rriten me 6 mijë denarë. Ne nuk do të heqim dorë, kjo duhet t’ju jetë e qartë. Nuk do të lejojmë që të luani me djersën dhe mundin e punëtorëve, nga taksat e të cilëve merrni pagë”, deklaori kryetari i LSM-së, Sllobodan Trendafilov.

 

Trendafilov paralajmëroi ashpërsim të reagimit të punëtorëve dhe grevë të përgjithshme nëse nuk ka rritje pagash, duke e cilësuar të papranueshme përfitimin e pikëve politike mbi vuajtjen e tyre. Nga LSM thanë se protestat do të vazhdojnë dhe do të radikalizohen nëse institucionet nuk reagojnë, me synim rritjen e pagave dhe përafrimin e tyre me standardin e vendeve fqinje, pasi aktualisht janë ndër më të ulëtat në rajon.