Sulme të reja ruse në Ukrainë, Zelenski: Sulmet dëmtojnë negociatat për paqe

 

"Si mund të ndihem kur shtëpia ime është shkatërruar? Shikojeni vetë. Jam thjesht i shokuar. E kalova gjithë jetën time duke e ndërtuar atë, dhe ja çfarë ndodhi. Bënte shumë zhurmë. Vrapuam me nxitim të dilnim nga shtëpia, të cilën e përfshiu zjarri. Gjyshi im Kolia u vra dhe matanë rrugës dy gra të reja u vranë gjithashtu.", - tha banori i Vilnianskut, Serhi. 

 

Zelenski paralajmëroi për sulme të reja masive që dëmtojnë procesin e negociatave dhe u bëri thirrje partnerëve të ushtrojnë presion mbi Putinin për t'i dhënë fund luftës.

 

"Përgatitjet e Rusisë për sulme të reja dëmtojnë besimin në diplomaci dhe të gjithë ata që mbrojnë paqen duhet të kontribuojnë në ndalimin e sulmeve dhe përfundimin e luftës, sepse bota ka fuqinë ta arrijë këtë.”, - theksoi presidenti i Ukrainës, Volodimir Zelenski.

 

Përpara bisedimeve në Abu Dhabi, sekretari i shtetit i ShBA-së, Marko Rubio, bëri të ditur se negociatat mes Rusisë dhe Ukrainës vijojnë të përballen me pengesa serioze. Ai theksoi se vëmendja është përqendruar te garancitë e sigurisë për Ukrainën, ku Shtetet e Bashkuara pritet të kenë një rol mbështetës, përfshirë edhe në koordinim me aleatët evropianë.

 

“Çështja e Donetskut mbetet një pengesë kryesore për paqen. Akoma ekziston një hendek mes të dyja palëve. Aktualisht flitet për garancitë e sigurisë; kjo është diçka për të cilën ekziston konsensus i përgjithshëm kur bëhet fjalë për Ukrainën. Është e qartë se garancia e vetme e sigurisë që po rishikohet përfshin vendosjen e trupave evropiane në terren, me mbështetje të fuqishme të ShBA-së.”, - theksoi sekretari i shtetit i ShBA-së, Marko Rubio.

 

Ai njoftoi gjithashtu mundësinë e bisedimeve të drejtpërdrejta mes Kievit dhe Moskës, ndërsa Kremlini bëri të ditur se presidenti rus Vladimir Putin është i gatshëm të takohet me homologun e tij ukrainas, Volodimir Zelenski, ndërsa Ukraina kërkon garanci sigurie për një takim të tillë.