Seanca për pyetje deputetësh; Përfaqësimi i drejtë, temë përplasjesh

 

“Duke pasur parasysh që përkatësia etnike nuk figuron në asnjë dokument personal, nuk ka përkatësi etnike të definuar askund, si ju si kryeministër ose si ministrat, drejtorët e institucioneve përkatëse, do të caktoni përbërjen etnike të institucionit që ju e drejtoni, duke u thirrur në vendimin Gjykatës Kushtetuese që të punësuarit aty mund të deklarohen se nuk duan të deklarojnë përkatësinë etnike.”, - deklaroi deputeti i Frontit Evropian, Skender Rexhepi. 

 

Kryeministri tha se nuk do të komentojë vendimet e Gjykatës Kushtetuese, ndërsa tha se absolutisht po mbahet llogari për përfaqësimin e drejtë dhe se garantues për atë është pikërisht ai. 

 

“As si njeri, as si politikan, as si kryetar i Qeverisë nuk do të lejoj askush askënd ta minimizojë apo majorizojë. Cilësia e njerëzve, pa dallim përkatësie etnike, duhet të jetë kyçe dhe prioritet. Ky është themeli i vlerës kushtetuese dhe pjesë e rezolutave dhe konventave ndërkombëtare.”, - theksoi kryeministri, Hristijan Mickoski.

 

Mickoski informoi se Ligji për përfaqësim të drejtë është gati dhe së shpejti duhet të hyjë në procedurë kuvendore, ndërsa theksoi se për këtë ligj pret përkrahje nga të gjitha partitë politike, meqenëse i njëjti ka marrë mendim pozitiv edhe nga Komisioni i Venecias.