Pas rrëzimit të Maduros në Venezuelë, Trampi e vë Kubën përballë kolapsit energjetik

 

“Pra, Kuba është një shtet i dështuar. Kështu ka qenë prej kohësh. Por, tani nuk e ka më Venezuelën që ta mbështesë. Prandaj bisedojmë me përfaqësuesit më të lartë të Kubës. Do të shohim se çfarë do të ndodhë. Dua që njerëzit të cilët erdhën këtu, pasi  Kuba i trajtoi në mënyrë të tmerrshme, të jenë të sistemuar dhe të mund të kthehen te familjet e tyre atje, të cilët nuk i kanë parë për shumë, shumë vite. Prandaj, do të arrij një marrëveshje me Kubën, e cila ndodhet në një gjendje shumë të keqe.”, - deklaroi presidenti i ShBA-së, Donald Tramp.

 

Vlerësohet se vendi i Karaibeve kalon një nga krizat më të rënda ekonomike që nga viti 1959, kur pas revolucionit u vendos regjimi i Fidel Kastros.

 

“Bota është shndërruar në Perëndimin e Egër. Kur isha i ri, tani jam 90 vjeç, shikoja filma ku përdornin armët për të vrarë indianët dhe për të pushtuar prona. Ky është shpirti i sherifit të ri të botës, Tramp.”, - tha një qytetar kuban.

 

“Kuba është kërcënim për kubanët, jo për Shtetet e Bashkuara të Amerikës. Për ne kubanët këtu, Qeveria është kërcënimi. Masat që merr Donald Tramp janë të rënda, sepse do të ndikojnë te njerëzit, jo te Qeveria.”, - tha një qytetar tjetër kuban.

 

Një nga partnerët më të rëndësishëm tregtarë të ShBA-së, Meksika, njoftoi me kujdes dërgesa të reja të ndihmës humanitare për Havanën.

 

“Sigurisht, nuk duam të rrezikojmë vendosjen e tarifave të tjera ndaj Meksikës, por thjesht të kërkojmë, përmes kanaleve diplomatike, një kornizë dialogu dhe komunikimi që do të parandalojë një situatë serioze për popullin kuban, i cili tashmë përballet me kushte shumë të vështira.”, - deklaroi presidentja e Meksikës, Klaudia Sheinbaum.

 

Shqetësim për rritjen e tensioneve mes Uashingtonit dhe Havanës shprehu edhe Papa Leoni XIV, duke u bërë thirrje të gjitha palëve të promovojnë dialog të sinqertë dhe efektiv.

 

“Me shqetësim të madh i mora lajmet për rritjen e tensioneve mes Kubës dhe ShBA-së, dy vende fqinje. Bashkohem me mesazhin e ipeshkvijve kubanë, duke ftuar të gjithë përgjegjësit të promovojnë dialog të sinqertë dhe efektiv për të shmangur dhunën dhe çdo veprim që mund të rrisë vuajtjet e popullit të dashur kuban.”, - theksoi Papa Leoni XIV.

 

Në vitin 2015, ShBA-ja dhe Kuba rivendosën marrëdhëniet diplomatike pas plot 54 vitesh ndërprerjeje, por tensionet e vazhdueshme dhe politikat ndëshkuese të viteve të fundit kanë penguar normalizimin e plotë të raporteve, duke e lënë ishullin të pambrojtur përballë krizave të rënda si ajo aktuale energjetike.