Në prag të negociatave në Abu Dhabi, sulme intensive ruse në Ukrainë

 

“As përpjekjet diplomatike të pritura në Abu Dhabi këtë javë, as premtimet e tij ndaj ShBA-së nuk e ndaluan atë të vazhdojë terrorin ndaj njerëzve të zakonshëm në dimrin më të ashpër. Ne përballemi me terroristë që duhet të detyrohen të ndalojnë dhunën. Bota i ka mjetet. Rrisni presionin ndaj Moskës.”, - deklaroi ministri i Jashtëm i Ukrainës, Andrij Sibiga.

 

Sulmet ndodhën menjëherë përpara vazhdimit të bisedimeve për paqe që pritet të mbahen në Abu Dhabi mes Ukrainës, Rusisë dhe ShBA-së. Presidenti ukrainas Volodimir Zelenski shprehu një optimizëm të moderuar se është e mundur një paqe e qëndrueshme dhe dinjitoze, duke theksuar rolin kyç të Uashingtonit. Ai bëri të ditur se me ShBA-në është përgatitur një dokument për garancitë e sigurisë pas luftës dhe se është duke u punuar në përpilimin e planeve për rindërtim ekonomik.

 

“Kjo tregon se kur në Amerikë ekziston motivimi për ta ndryshuar situatën, ajo mund të ndryshohet. Delegacioni ynë është tashmë në rrugë, do të mbahen takime jo vetëm në format trepalëshe, por edhe dypalëshe me Amerikën. Është e rëndësishme që në këtë moment Amerika e mbështet vendosmërisht dialogun dhe punon me palën ruse për sulmet, në mënyrë që ato të mos e dëmtojnë atë që mund të arrihet.”, - theksoi presidenti i Ukrainës, Volodimir Zelenski.

 

Presidenti amerikan Donald Tramp, për herë të parë shprehu besim se mund të ketë lajme të mira lidhur me zgjidhjen e çështjes ukrainase.

 

“Kemi shumë punë. Kemi zgjidhur tetë luftëra dhe mendoj se po ecim shumë mirë me Ukrainën dhe Rusinë. Për herë të parë, mendoj se ndoshta do të kemi disa lajme të mira.”, - u shpreh presidenti i Ukrainës, Donald Tramp.

 

Në negociata mbeten ende të pazgjidhura çështjet territoriale. Nga Kremlini shprehen se procesi është i ndërlikuar, duke e refuzuar kategorikisht mundësinë e dislokimit të trupave të BE-së ose NATO-s në territorin ukrainas si pjesë e garancive të sigurisë për Kievin.

 

“Ky është një proces shumë kompleks dhe shumëdimensional. Jemi afruar në disa çështje për shkak të diskutimeve dhe bisedimeve. Për disa tema është më e lehtë të gjendet një bazë e përbashkët, por ka çështje për të cilat ende nuk i kemi afruar qëndrimet. Është një proces shumë i ndërlikuar.”, - deklaroi zëdhënësi i Kremlinit, Dmitrij Peskov.

 

Ndërkohë, sot ka hyrë në fuqi rregullorja për ndërprerjen graduale të importit të gazit rus në Bashkimin Evropian, konfirmoi Komisioni Evropian, ndërsa Hungaria ka paraqitur padi në Gjykatën e Drejtësisë së BE-së për anulimin e saj.