Kosovë, a do të zgjidhet presidenti i ri deri më 4 mars?

05.02.2026 15:37

Vazhdon procedura e ankimimit për zgjedhjet...

Vazhdon procedura e ankimimit për zgjedhjet e 28 dhjetorit të vitit të kaluar në Kosovë, ndërkohë që po afrohet 4 marsi, deri kur Kuvendi i Kosovës duhet të zgjedhë presidentin e ri të shtetit, pasi paraprakisht të ketë përfunduar procedurën e konstituimit, përfshi zgjedhjen e kryeparlamentarit.
 

Kryeministri në detyrë, Albin Kurti, sot nuk deshi të përgjigjet në pyetjet e gazetarëve se a synon që të krijojë koalicion qeverisës, që do të mundësonte më lehtë zgjedhjen e presidentit të ri të shtetit. Por, një dit më parë, Kurti ka sqaruar se po bëhen përgatitje që sa më parë të bëhet konstituimi i Kuvendit dhe zgjedhja e Qeverisë së re, e më pas edhe miratimi i buxhetit dhe marrëveshjeve ndërkombëtare, për të shkuar te zgjedhja e presidentit të shtetit.

“Njëherë këto tre hapa do t’i përmbyllim, pastaj edhe te hapi i katërt do të ecim mbarë e mirë.”, - theksoi kryeministri në detyrë i Kosovës, Albin Kurti.
 
Deri më tani ambicie për postin e presidentit kanë shprehur presidentja aktuale Vjosa Osmani dhe kreu i AAK-së, Ramush Haradinaj, ndërsa si kandidat i mundshëm është përmendur edhe dikush nga familja Jashari.
 
Për zgjedhjen e presidentit në raundin e parë të votimit nevojiten 80 vota, që nënkupton se për t’u konsumuar ky raund, në sallën e Kuvendit, duhet të jenë të pranishëm të paktën 80 deputetë. Dhe nëse në raundin e parë nuk zgjidhet presidenti me dy të tretat e votave, por kanë qenë të pranishëm 80 deputetë, në raundin e dytë presidenti mund të zgjidhet me 61 vota. Por nëse dështon zgjedhja e presidentit deri më 4 mars, Kosova automatikisht shkon përsëri në zgjedhje të parakohshme parlamentare. (Gyltene Sinani, TVM2)