Prishtinë, protesta kundër shtrenjtimit të rrymës

Qytetarët kosovarë kanë protestuar para Korporatës Energjetike Distribuuese në Kosovë dhe para Qeverisë kundër rritjes së paralajmëruar të çmimit të energjisë elektrike për 20%.

Sipas protestuesve, kompanitë energjetike në Kosovë, me çmimet e larta po i ngulfasin qytetarët, duke luajtur dhe rolin e fajdexhinjve.

Ata paralajmëruan se faturat me çmim më të lartë do të bojkotohen dhe do të bllokohen rrugët e institucionet.

“Në vitin 2022 KEDS kërkon që të shtrenjtohen faturat e rrymës, këta e arsyetojnë se ka shtrenjtim anë e mbanë botës dhe ne i besuam. Vitin tjetër KEDS bëri të njëjtën kërkesë dhe ndonëse skeptik, i lejuam që të vjedhin pak më shumë se vitin e kaluar. Sot KEDS thjesht zgjat dorën drejt në xhepat tonë dhe merr aq sa ia do qejfi. E kemi pa tashmë që kjo dëshirë nuk ngopet askund, se apetiti i KEDS është i gatshëm që të na ngulfatë që të trashë profitin e tyre.”, - deklaroi aktivisti, Erblin Ajdini.

“Populli do të mbetet në terr. Një pjesë e madhe do të mbesim borxh te KEK-u dhe do të mbesim në terr, ja kjo është Qeveria jonë, këta vet i kanë rregulluar punët, voziten me xhipa të zinj, kanë para, kanë luks, hanë ushqime të mira. Ne si do të jetojmë, çka do të hamë e çka do të pimë. Ne vetëm rrymën duhet ta paguajmë dhe ujin, për t’ia plotësuar shtetit pagesat. E ne çka duhet të hamë? Sa barnat e shtrenjta, sa sëmundjet i ka dërguar Zoti, si do të jetojmë ne?!”, - theksoi aktivistja, Sevdije Sadiku.

Gjatë protestës pati edhe tensione mes protestuesve dhe policisë. Kjo e fundit arrestoi një qytetarë, i cili u dyshua se ka hedhur me ngjyrë të kuqe në drejtim të KEDS-it, ndërsa protestuesit kundërshtuan arrestimin. (Gyltene Sinani, TVM2)