Rusia intensifikon bombardimet mbi Ukrainë

 

Gati 20 persona u plagosën në sulmet e orëve të para të mëngjesit, njoftoi Policia Kombëtare. Në total, Rusia lëshoi më shumë se 400 dronë dhe raketa në lokacione anembanë vendit, tha presidenti ukrainas, Volodimir Zelenski. Së bashku me Slovianskun, Kramatorsku është një nga dy qytetet kryesore që Ukraina ende i kontrollon në rajonin lindor të Donjeckut. Të dy konsiderohen “qytete-fortesa”, thelbësore për mbrojtjen e Ukrainës në këtë rajon.

 

Rusia e ka bërë kapjen e gjithë rajonit të Donjeckut një prioritet strategjik, një pikë që e ka theksuar vazhdimisht në bisedimet e vazhdueshme të paqes të ndërmjetësuara nga Shtetet e Bashkuara. Gjatë gjithë këtij dimri, Rusia ka shënjestruar pa pushim banesat civile në të gjithë Ukrainën, si dhe rrjetin energjetik dhe objektet e ngrohjes së vendit. Miliona njerëz në kryeqytetin Kiev dhe në qytete të tjera janë përballur me ndërprerje të energjisë elektrike ose të ngrohjes, ndërsa i ftohti e ka mbërthyer vendin për javë të tëra.