LSM-ja protestoi para Kuvendit, Trendafilov: Deputetët të votojnë propozim-ligjin

 

“Deputetët dëshirojnë që punëtorët dhe votuesit e tyre të zhyten dhe të jetojnë në varfëri. Kjo është e turpshme. Prandaj, sot jemi këtu në orën 09:00 për t’i bllokuar dhe për t’u treguar se po sillen në mënyrë çnjerëzore ndaj punëtorëve, sepse dëgjuam se deputetët po i mbrojnë pagat dhe shpenzimet e tyre rrugore, e jo pagat e punëtorëve. Një të drejtë që ua kemi siguruar ne punëtorëve, nga ana tjetër nuk ua mundësojnë punëtorëve një rritje të tillë. Pikërisht për këtë arsye, destinacioni i parë ishte këtu dhe bllokada zgjati deri në fillimin e seancës së parashikuar në Kuvend, e caktuar në orën 11:00. Mendoj se dita e sotme duhet t’i turpërojë të gjithë, e veçanërisht 120 të zgjedhurit e popullit. Prandaj vlerësoj dhe shpresoj që sot, në seancën që duhet të mbahet, urgjentisht të propozohet rritja e pagës minimale në 600 euro, si dhe rritje e të gjitha pagave të tjera për së paku 6 mijë denarë.”, - deklaroi kryetari i LSM-së, Sllobodan Trendafillov.

 

Qytetarët që kishin dalë në protesta shpresojnë se do ta fitojnë “betejën” sindikale dhe se do të arrijnë që paga minimale të rritet në përputhje me kërkesat e LSM-së.

 

“Jam sindikaliste prej rreth 35 vitesh, punoj në arsim dhe me përkushtim ndaj punës që bëj. Mirëpo tani, kur po i afrohem fundit të stazhit tim profesional, po pendohem dhe po turpërohem që jam pjesë e arsimit, sepse të gjithë këta që po i shihni sot në Kuvend nuk kanë ardhur drejtpërdrejt nga spitali ku kanë lindur për t’u ulur në Kuvend. Ata është dashur të kalojnë përmes procesit arsimor. Prandaj është shumë e turpshme të degradohet profesioni ynë, i cili përfaqëson të ardhmen e këtij vendi. Nëse dëshironi ta shkatërroni një shtet, nuk ju nevojitet asnjë plumb, mjafton ta shkatërroni arsimin.”, - tha një qytetare. 

 

“Tani për tani, pushteti nuk ka veshë për ta dëgjuar zërin e popullit, mirëpo ne do të jemi këmbëngulës dhe do të shkojmë deri në fund.”, - tha një qytetare tjetër.

 

“Mendoj se duhet t’i dëgjojnë kërkesat tona. Është koha e fundit, por nëse do të ketë rritje, mbetet për t’u parë.”, - u shpreh një qytetar.

 

Protestat e LSM-së në rrugë do të vazhdojnë edhe gjatë kësaj jave dhe javës së ardhshme, deri në përmbushjen e kërkesave të tyre. Sipas paralajmërimeve, LSM-ja të enjten pritet të protestojë para Odës Ekonomike në qendër të qytetit, ndërsa të martën e ardhshme, kur mbahen seancat e rregullta të Qeverisë, do të bllokojë rrugët përreth ndërtesës së Qeverisë.