LSDM dhe VMRO-DPMNE përplasen, akuza për tenderë dhe marihuanë

 

“Kompania „Lendi Grup“ DOOEL Shkup, ka fituar 74 tenderë në vlerë prej 17,6 milionë eurosh brenda vetëm dy viteve. Rritja e papritur e kontratave të lidhura fillon në vitin 2024, vazhdon gjatë 2025-ës dhe shtrihet deri më sot. Vetëm vitin e kaluar janë lidhur 59 kontrata, kryesisht me komuna të udhëhequra nga VMRO. Në mënyrë simptomatike, vlera e këtyre kontratave pothuajse përputhet plotësisht me vlerën e parashikuar të tenderëve.”, u shpreh Aleksandar Sasha Dimitrijeviç nga LSDM. 

 

Nga VMRO-DPMNE kundërpërgjigjen duke thënë se LSDM po bën politikë populiste, ndërsa sqarojnë se kompani të njëjta kanë fituar tenderë edhe në kohën kur social-demokratët kanë qenë në pushtet. 

 

“LSDM që numëron këto tenderë në dy vitet e fundit duhet ta zgjerojë llogaritë në vitet e kaluara, kur ata kanë qenë në pushtet dhe do të vijnë në konstatim se e njëjta kompani, ndoshta edhe dyfishin e ka fituar kur institucionet I kanë udhëhequr LSDM së bashku me BDI-në.”, u shpreh Brane Petrushevski nga VMRO-DPMNE.

 

Nga “Pallati i bardhë” ndërkohë akuzojnë kryetarin e LSDM-së Venko Filipçe për lidhje me biznesin e marihuanës. 

 

“Kompania CBT Medplant e Toni Kotevit, së cilës i janë sekuestruar 30 tonë drogë, fiton miratim nga qeveria për kultivim të marihuanës për qëllime mjekësore në vitin 2020. Në atë periudhë Filipçe ka qenë ministër i shëndetësisë dhe personalisht i ka miratuar licencat për kultivimin e marihuanës, me çka jo vetëm që ka bashkëpunuar me Kotevin, por edhe e ka ndihmuar të merret me këtë biznes.”, akuzoi Petrushevski.

 

Nga LSDM pretendimet e VMRO-DPMNE-së i quajnë si tentim për defokusim, ndërsa bëjnë thirrje që partia në pushtet të përgjigjet qartë se si kanë kaluar 5 tonë marihuanë nga kufiri. 

 

“Nga DPMNE-ja shohim se në periudhën e kaluar nuk kanë dhënë përgjigje për asnjë pyetje dhe po bëjnë një defokus klasik të opinionit nga temat thelbësore. A kemi ndonjë përgjigje se si kanë kaluar 5 tonë drogë përmes kufirit? A kemi përgjigje për të gjitha ato tema dhe skandale që i ngremë si pyetje, lidhur me kompani të afërta me DPMNE-në.”, tha Dimitrijeviç.

 

Sipas LSDM-së lidhja e kompanive shkon drejtpërdrejtë në kabinetin e Mickoskit.