MPB: U vetëdorëzua ish-zëvendëskryeministri Artan Grubi

 

“Sot në orën 06:10 minuta, në pikën e kalimit kufitar Bllacë, në hyrje të shtetit, u privua nga liria Artan Grubi, i cili kërkohej me urdhërarrest ndërkombëtar lidhur me hetimin e veprës së kryer penale.”, - deklaroi Goce Andreevski nga MPB.

 

 

Pas arrestimit nga policia, Grubi është transferuar në burgun e Shuto Orizares, pasi ndaj tij ishte shqiptuar masa 30 ditë paraburgim në mungesë, deri sa ai ishte në arrati. 

 

“Nga ana e pjesëtarëve të MPB-së, personi Artan Grubi është sjellë në institucionin ndëshkues përmirësues Shkup në ora 09:20 minuta. Pas kontrollit nga mjeku është vendosur në sektorin e paraburgimit, pasi mjeku ka konstatuar se është në gjendje të mirë shëndetësore. Ai nuk ka ndonjë kërkesë të veçantë.”, - theksoi drejtori i burgut të Shutkës, Boban Utkovski.

 

Grubi, i cili ishte zëvendëskryeministër i parë në qeverinë e kaluar të Koalicionit LSDM-BDI, u vetëdorëzua pas 14 muajsh në arrati, pasi nga 11 dhjetori i viti 2024 u largua nga Maqedonia e Veriut, pak ditë para ngritjes se akuzave nga Prokuroria Publike. Ai ndiqet penalisht për përvetësim në shërbim lidhur me punën e Lotarisë Shtetërore, ku i dyshuar është edhe Përparim Bajrami. Sipas pretendimeve të Prokurorisë, bëhet fjalë për një krim me vlerë rreth tetë milionë eurosh, përmes furnizimit me aparate VLT.

 

Grubi ka udhëhequr seancën e Qeverisë në të cilën është miratuar kërkesa për furnizimin me aparatet VLT, ndonëse, siç pretendohet, procedura e prokurimit publik ka qenë e paligjshme. Gjetjet e revizionit po ashtu kanë evidentuar mbi 180 milionë denarë, përkatësisht afro tre milionë euro, dokumentacion të kontestueshëm, të pavlefshëm apo të parregullt në punën e Lotarisë. Gjithashtu, me vendim qeveritar të miratuar në një seancë të udhëhequr nga Grubi, është tjetërsuar tokë shtetërore në favor të një kompanie të lidhur me bashkëshorten e ish-kryeministrit Dimitar Kovaçevski, për ndërtimin e centraleve fotovoltaike, me çmim prej 70 denarë për metër katror.

 

Po ashtu Grubi, që nga 9 dhjetori 2024, ndodhet edhe në “listën e zezë” të Departamentit Amerikan të Shtetit, për shkak të, siç thuhet, “përfshirjes në korrupsion të konsiderueshëm përmes marrjes së ryshfetit, me qëllim minimin e proceseve gjyqësore”.