Seancë e re për zjarrin në Koçan, Shilegov akuzon Prokurorinë për standarde të dyfishta

 

Avokati Petre Shilegov kërkoi që gjykata ta ndërpresë procedurën për zjarrin në Koçan, pasi, siç theksoi ai, është cenuar barazia e të akuzuarve – mes atyre që ndiqen nga Prokuroria Publike dhe policëve të akuzuar nga Prokuroria për Ndjekjen e Krimit të Organizuar dhe Korrupsionit.

 

Gjyqtarja nuk e pranoi kërkesën, duke arsyetuar se ajo nuk mund ta urdhërojë Prokurorinë se çfarë lloj aktakuze duhet të ngrejë.

 

“Janë të dukshme standardet e dyfishta që në periudhën e fundit mund t’i shohim seriozisht nga ana e Prokurorisë Publike. Nuk do të ndalem te çështjet më aktuale, por te periudha konkrete. Prokuroria, e cila sipas ligjit është organ i vetëm, ka dy raste, këtë dhe atë kundër policëve që e udhëheq Prokuroria Themelore Publike për Ndjekjen e Krimit të Organizuar dhe Korrupsionit. Sipas ligjit, Prokuroria është organ i vetëm, por dukshëm nuk i trajton qytetarët në mënyrë të barabartë. Kemi dallim në kualifikimin juridik për këta persona dhe në kualifikimin juridik për rastin që e udhëheq Prokuroria. Një disproporcion i tillë është diskriminim dhe ajo që po bën Prokuroria është shpërdorim i detyrës zyrtare nga disa prokurorë.”, - deklaroi avokati, Petre Shilegov.

 

Nga ana tjetër, prindërit e viktimave me ngulm kërkojnë gjykim të drejtë dhe përgjegjësi.

 

“Si është e mundur që Ministria e Ekonomisë të japë licencë për kabare, kur më parë nuk ka pasur ndryshim të destinimit të tokës? Praktikisht ata japin leje për shfrytëzimin e kabaresë, ndërkohë që objekti ka qenë i destinuar vetëm si sallon për qilima, depo për qilima. Këtë askush prej tyre nuk e thotë dhe vetëm e spekulojnë opinionin publik. Prokuroria e ka të qartë, ka 200 gigabajt prova dhe nuk ka pse të zvarritet çështja. Le të vazhdojë procedura siç duhet, gjyqtarja le ta udhëheqë procesin.”, - theksoi prindi, Aleksandar Naunov.

 

Me dëshmitë e pesë dëshmitarëve të Prokurorisë vazhdoi procesi gjyqësor për zjarrin në diskotekën “Puls” në Koçan, ku humbën jetën 63 persona dhe mbi 220 të tjerë u plagosën.

Për vepra të rënda kundër sigurisë së përgjithshme po gjykohen 35 persona fizikë dhe tre persona juridikë. Seanca e mëparshme u shty, pasi i pandehuri i katërt, pronari i objektit, ishte në trajtim spitalor.