Dita Ndërkombëtare e Sëmundjeve të Rralla, Aliu: MSH nuk do të lejojë pacientët të presin për ilaçe

 

“Për herë të parë në vendin tonë, po hapim një procedurë trevjeçare. Çdo vit, pacientët me sëmundje të rralla i merrnin ilaçet e tyre me vonesë ose, për fat të keq, prisnin një javë ose një muaj. Duke marrë parasysh faktin se pacientët janë të rinj, dhe ilaçet lidhen me peshën e pacientit, është shumë e vështirë të bëhet një analizë që do të jetë e saktë për numrin e pacientëve që do të shërbehen gjatë gjithë vitit. Për këtë qëllim, metodologjia ka ndryshuar dhe tani po hapim një procedurë për tre vjet. Në rast se shpenzohen më shumë se sasitë që ka shteti, do të kemi kohë të hapim një procedurë tjetër, në mënyrë që qytetarët t’i marrin ilaçet në kohë. Procedura e tenderimit do të jetë trevjeçare, domethënë do të përdoren aq sasi sa na nevojiten në shtet”, deklaroi ministri i Shëndetësisë Azir Aliu.

 

Ai tha se kjo kategori qytetarësh dhe familjet e tyre duhet të jenë të qetë sepse shteti dhe Ministria e Shëndetësisë, siç thotë ai, nuk do të lejojnë që asnjë nga pacientët tanë me sëmundje të rralla të presë as edhe një ditë për ilaçe.