MPJ e RMV-së: 473 shtetas duan të largohen nga lindja e mesme

 

Për momentin nuk ka mundësi për evakuim nga Emiratet dhe Katari, ndërsa po shqyrtohen alternativa të mundshme për nxjerrjen e sigurt të shtetasve maqedonas nga Tel Avivi, informojnë nga Ministria e Punëve të Jashtme e Maqedonisë së Veriut. 

 

“Sipas informacioneve të marra nga autoritetet kompetente, aktualisht ende nuk rekomandohet evakuimi me rrugë tokësore për qytetarët që ndodhen në Katar dhe Emiratet e Bashkuara Arabe. Evakuimi do të nisë në momentin e parë të sigurt, ndërsa tashmë po shqyrtohen mundësitë për nxjerrjen e tyre të sigurt sapo të krijohen kushtet e përshtatshme”, thuhet në njoftimin e MPJ-së. 

 

 

Kjo minsitri u bën apel bashkatdhetarëve që të ndjekin rregullisht paralajmërimet dhe udhëzimet e organeve kompetente lokale, ndërsa mund të kontaktojnë edhe shtabin e krizës pranë ministrisë si dhe përfaqësitë diplomatike konsulare në numrat e telefonit që janë në dispozicion. 

 

“Duke pasur parasysh përpjekjet e dukshme të Iranit për të targetuar, përveç Izraelit, edhe disa shtete arabe, përfshirë Emiratet e Bashkuara Arabe, Katarin, Kuvajtin, Bahreinin, Arabinë Saudite, Libanin dhe Irakun, si dhe bazën ushtarake britanike në territorin e Republikës së Qipros, Ministria edhe një herë u bën apel të gjithë shtetasve të Republikës së Maqedonisë së Veriut që të përmbahen nga udhëtimet e panevojshme në rajonin më të gjerë të Lindjes së Mesme”, thuhet në njoftimin e minsitrisë së Punëve të Jashtme.