Irani mban varrim masiv për 168 nxënëset e vrarë në sulmin mbi shkollën e vajzave

Në Iran u mbajt një ceremoni masive mortore për 168 nxënëse dhe 14 mësues të një shkolle vajzash në qytetin e Minabit, e cila u godit të shtunën, në ditën e parë të sulmeve amerikano-izraelite ndaj Iranit. Televizioni shtetëror iranian shfaqi mijëra njerëz të mbledhur në një shesh në Minab, ndërsa Ministri i Jashtëm, Abbas Araghchi, akuzoi SHBA-në dhe Izraelin për vrasjen e vajzave, më të rejat prej të cilave ishin vetëm shtatë vjeç.

​„Këto janë varre që po hapen për më shumë se 160 vajza të reja të pafajshme, të cilat u vranë në bombardimet amerikano-izraelite mbi një shkollë fillore. Trupat e tyre u bënë copë-copë. Kështu duket në realitet ‘shpëtimi’ që premtoi Trumpi“, shkroi Araghchi në platformën X.

​Ushtria izraelite njoftoi gjatë fundjavës se nuk ka informacione për ndonjë sulm amerikan apo izraelit në atë zonë, ndërsa zëdhënësi i Komandës Qendrore të ushtrisë amerikane deklaroi se po e hetojnë rastin.
​„SHBA-ja nuk do të shënjestronte një shkollë qëllimisht“, tha Sekretari amerikan i Shtetit, Marco Rubio.

​Shkolla fillore „Shajaba Tayyiba“ ndodhet vetëm 60 metra larg një baze ushtarake iraniane në jug të vendit. Pas sulmit, mediat shtetërore iraniane publikuan pamje nga shkolla e shkatërruar, me çanta shkolle dhe libra të shpërndarë kudo.