Reagime për Nenad Saveskin, Mickoski: Kishte biografinë më të mirë

 

“Njëkohësisht janë marrë parasysh edhe përfundimet e Këshillit të Prokurorëve Publikë. Arritëm në përfundimin se Nenad Saveski mund të jetë një zgjidhje e përshtatshme për prokuror të ri publik të shtetit. Unë personalisht nuk e njoh, por nga ajo që munda të shoh nga biografia e tij dhe nga informatat që morëm përmes pyetjeve dhe interesimit, vlerësojmë se ai mund të jetë një prokuror publik shtetëror i shkëlqyer.”, - deklaroi kryeministri, Hristijan Mickoski.

 

 

Nga LSDM theksojnë se nuk do të nxitojnë me gjykime të parakohshme, por se do ta ndjekin me kujdes punën e tij, veçanërisht në rastet që lidhen me korrupsion dhe tenderë, për të parë nëse ai do të ketë guximin të veprojë edhe kur rastet çojnë drejt pushtetit.

 

“Të veprojë sipas ligjit, të ndjekë krimin, pa marrë parasysh kush qëndron pas tij dhe të tregojë se prokuroria nuk është instrument i pushtetit. Mënyra se si u zhvillua shkarkimi i prokurorit të mëparshëm, presionet politike dhe eliminimi i një prokurori publikisht në televizion nga ana e Mickoskit, lënë dyshime serioze për qëllimet e pushtetit.”, theksojnë nga LSDM. 

 

 

Ndërkohë, BDI vlerëson se kandidati për kryeprokuror i plotëson kushet formale, ndërsa shprehin pakënaqësi që Qeveria nuk zbatoi një proces transparent dhe konsultativ, gjë që ngre dyshime mbi qasjen. 

 

“Presim që puna e tij të mos jetë pjesë e pritjeve të pushtetit për një prokuror të afërt me politikën, por të kontribuojë në forcimin e sundimit të ligjit dhe në ndjekjen e krimit duke respektuar standardet bashkëkohore të një procedure të drejtë dhe të ndershme.”, theksojnë nga BDI.

 

Përndryshe pritet që këto ditë propozimi i Qeverisë për emërimin e Nenad Savevskit për shef të ri të Prokurorisë Publike të shkojë në Kuvend, për të marrë dritë të gjelbërt.