RMV: Furnizimi me karburant, i qëndrueshëm

 

“Dua që fillimisht të potencoj se furnizimi me derivatet e naftës në vendin tonë është stabile, ndërsa kompanitë kanë rezerva të mjaftueshme. Qeveria me vëmendje është duke i ndjekur lëvizjet, dhe nëse konstaton se çmimet vazhdojnë të rriten, do t’i shfrytëzojmë të gjitha mekanizmat që i kemi në dispozicion.”, - deklaroi ministrja e Energjetikës, Sonja Bozhinovska.

 

Ndërsa numri një i kompanisë OKTA bëri të ditur se ky lirim për kompanitë e naftës, në masë të madhe do t’u ndihmojë edhe qytetarëve.

 

“Nga dita e nesërme deri në fund të muajit do të bëjmë një lirim prej 2 denarëve për një litër për të gjitha kompanitë që shesin atë me pakicë dhe kompanitë që janë furnizues të rregullt nga OKTA. Me këtë i mundësojmë këtyre kompanive që shitjen e derivateve ta bëjnë me lirim deri tek shfrytëzuesit.”, - theksoi drejtori i kompanisë OKTA, Dimitris Pas’hos. 

 

Për ministren Bozhinovska, konflikti i Lindjes së Mesme ka bërë që të ndërpritet furnizimi me naftë nga Ngushtica e Hormuzit, e ku kalon 20 për qind e naftës botërore. Pas fillimit të konfliktit të armatosur në Lindjen e Mesme e gjithë bota është duke reaguar me masa afat shkurte. Agjencia Ndërkombëtare për Energjetikë ka njoftuar se do të lirojë rreth 400 milionë fuçi naftë nga rezervat e saja.