Rriten çmimet e derivateve të naftës, benzina për 7 denarë, dizeli për 6.5 denarë

 

“Sipas çmimores së re, një litër EUROSUPER BS-95 do të kushtojë 86.50 denarë, ndërsa EUROSUPER BS-98 do të shitet për 88.50 denarë. Çmimi i ri i EURODIESEL (D-E V) do të jetë 92 denarë për litër, ndërsa vaji ekstra i lehtë do të kushtojë 89.50 denarë për litër. Mazuti do të shitet me 47.453 denarë për kilogram.”, - thanë nga KRrE.

 

Nga Komisioni thonë se këto rritje janë pasojë e rritjes së çmimeve të produkteve të naftës në bursat botërore, si dhe e rritjes së vazhdueshme të kursit të dollarit ndaj denarit gjatë pesë ditëve të fundit. 

 

“Çmimet referente të derivateve të naftës në tregun botëror, në krahasim me përllogaritjen e mëparshme, shënojnë rritje te benzina mesatarisht 16.9 %, te nafta rritja është mesatarisht 11.7%, te vaji ekstra i lehtë rritja është mesatarisht 13% dhe te mazuti rritja është mesatarisht 14.5%, me ç'rast në strukturën e çmimeve të derivateve të naftës është bërë përshtatje përkatëse. Kursi i denarit në raport me dollarin në periudhën e kaluar, duke pasur parasysh ndikimet e këtyre elementeve në formimin e çmimeve të derivateve të naftës sipas Metodologjisë, çmimet e shitjes me pakicë të derivateve të naftës në përputhje me Metodologjinë e formimit të çmimeve rriten mesatarisht për 8.98 %.”, - thanë nga KRrE.

 

Edhe pse bëhet fjalë për përcaktim të çmimeve maksimale, Komisioni Rregullator për Energjetik u bëri thirrje kompanive të naftës që t’i ulin çmimet me pakicë për 2 denarë për litër, duke iu referuar zbritjes së dakorduar ndërmjet Qeverisë dhe furnizuesit kryesor “OKTA”.

 

Të hënën e kaluar gjithashtu pati një rritje të konsiderueshme të çmimeve, kur dizeli u shtrenjtua për 14 denarë, ndërsa benzina për 5 denarë për litër.