Kuvend, Nenad Saveski u zgjodh kryeprokuror i ri

 

“Ky prokuror do të duhet të merret me këto raste që të dëshmojë se mundet të riaktualizohen fatkeqësitë e njerëzve, dhimbjet e njerëzve dhe drejtësia e atyre që kanë humbur jetë të vijë në peshën e duhur dhe në pozicionin e duhur për të gjithë flasë për të tria rastet: “Alfa”, “Monstra” dhe Koçani.”, - deklaroi Skender Rexhepi nga Fronti Evropian.

 

Për deputetin Halil Snopçe, prokurori i ri duhet të procesuojë lëndët e jo të vazhdojë të jetë institucion i kotë.

 

“Rasti “Monstra”, rasti “Alfa”, ku disa njerëz po vuajnë burgun e përjetshëm, e nëse nuk janë fajtorë, a thuhet se ka dëshmi edhe incizime, si mund të tolerohet diçka e tillë. Prandaj, thash njerëzit janë të prirë të besojnë se kot i kemi, do të vazhdojë funksionaliteti së koti i këtyre instancave koti, njësoj sikurse prokuroria speciale që ishte shpresa më e madhe.”, - theksoi deputeti i ASh-së, Halil Snopçe.

 

Përplasja më e madhe ndodhi midis deputetes së LSDM-së, Jovanka Trençevska, me deputetët e VMRO-DPMNE-së. Palët shkëmbyen akuza të ndërsjella se kush ka ngulfatur më shumë sistemin e drejtësisë, pasi Trençevska tha se emërimi i prokurorit të ri edhe përkundër biografisë cilësore, paraqet hap i parë i kontrollit partiak ndaj Prokurorisë.

 

“A do të jepni dorëheqje nëse Qeveria në bazë të nenit 100, dispozita 7 e shkurton buxhetin, pasi që do të keni hapur hetime për krimin e Qeverisë aktuale? Si planifikoni ta ruani autonominë, kur vini në vendin e një personi i cili publikisht u eliminua me kërcënime televizive nga kryeministri, pasi ai refuzoi të jetë ekzekutues partiak?”, - u shpreh deputetja e LSDM-së, Jovanka Trençevska.

 

“Ju me flamur evropian për pesë orë miratuat ligj për prokurori publike. Dhe, ky është dallimi, ju ashtu i shihnit se duhet të ndodhin punët. Për ju është shokuese kur dikush nuk dëshiron që të instalojë prokurorë publikë që nuk i njeh.”, - deklaroi deputeti i VMRO – DPMNE-së, Bojan Stojanovski.

 

Nuk mungoi as reagimi i zëvendëskryeministrit të Qeverisë, Nikollovski, për të cilin socialdemokratët janë jo të denjë për të folur për prokurori transparente.

 

“Prokurori paraprak kishte mandat një vit e gjysmë. Për këtë periudhë i vendoste rastet në sirtarë, nuk zgjidhte lëndë, nuk vepronte dhe i mbronte miqtë tuaj të ish-kryesisë së LSDM-së. Kur flasim për kontrollin, një pjesë e madhe e këshillit gjyqësor dhe të prokurorëve kontrollohet direkt nga Strumica, nga Zoran Zaev.”, - theksoi zëvendëskryeministri, Aleksandar Nikollovski.

 

Nenad Saveski vjen në postin e kryeprokurorit nga Gjykata Penale e Shkupit, sektori për krim të organizuar. Në krye të Prokurorisë paraprakisht ishte Ljupço Kocevski, i cili u zgjodh në vitin 2024, por u dorëhoq pasi u përball me kritika të shumta nga Qeveria për efikasitetin e ulët në luftën kundër krimit dhe korrupsionit.