AUV ndalon 50 ton ushqim të pasigurtë, bllokohen 27 ton mish i grirë nga Paraguai

 

 

"Veterinarët zyrtarë të AUV-së në vendkalimin kufitar Qafë Thanë ndaluan importin e 27 tonelatave mish të bluar viçi me prejardhje nga Paraguaji. Vendimi për ndalesë për hyrje të mishit në shtetin tonë është marrë pas kontrollit të kryer në sistemin informativ të AUV-së dhe të dokumentacionit importues sipas të cilit sasitë të cilat duhej të importoheshin dhe të përfundojnë në tregun e vendit vinin nga një object, i cili nuk është miratuar nga Agjencia për Ushqim dhe Veterinari, me çka nuk janë përmbushur standardet themelore të sigurisë për import, përkatësisht ekzistojnë dyshime për rregullshmëri shëndetësore të mishit, që paraqet rrezik për konsumatorët", - thuhet në komunikatën e lëshuar nga Agjencia për Ushqim dhe Veterinari.

 

 

Por kjo nuk është gjithçka. Ditëve të fundit, inspektorët për ushqim kanë pasur duart plot me punë, duke ndaluar edhe 22 ton të tjera me arra me prejardhje nga Kazakistani, për shkak të shënimeve joadekuate dhe mosrespektimit të kritereve të caktuara për cilësi dhe siguri të ushqimit.

 

"Për atë shkak, e tërë sasia prej 22 tonelatave është kthyer në vendin e prejardhjes, përkatësisht, është ndaluar plasmani i saj në tregun e vendit tonë", thuhet më tej në komunikatën e AUV-së duke theksuar se kontrollet e importit të ushqimit nga ana e veterinarëve zyrtarë dhe inspektorëve për ushqim do të vazhdojnë me tempo të përforcuar, me qëllim që të parandalohet futja e prodhimeve të pasigurta dhe u bëjnë thirrje importuesve t'i respektojnë rregullativat dhe standardet ligjore sepse shëndeti i qytetarëve mbetet prioritet kryesor për institucionin.