Republika e Kosovës, përkujtohet 27-vjetori i sulmeve të NATO-s

 

“Më 24 mars 1999, përballë një tragjedie njerëzore nga veprimi gjenocidal i Serbisë, aleanca ushtarake më e fuqishme e botës demokratike ndërmori veprime vendimtare për të ndalur mizorinë e regjimit kriminal. Ky ishte një akt që i dha fund një epoke të errët dhe hapi rrugën drejt lirisë dhe paqes. “NATO air, just do it” mbetet simbol i thirrjes për veprim në mbrojtje të vlerave universale, një thirrje që u dëgjua dhe u përkthye në vendim dhe përgjegjësi historike. Mirënjohje e përhershme për gra e burra të NATO-s, të cilët qëndruan në anën e drejtë të historisë.”, theksoi presidentja Osmani, duke shtuar se kjo ditë rikujton se liria dhe paqja kërkojnë përkushtim të vazhdueshëm “dhe se, në momentet vendimtare, veprimi është ai që e përcakton historinë”. 

 

Kryetarja e Kuvendit, Albulena Haxhiu, ka thënë se bombardimet e NATO-s mbi objektivat serbe ndryshuan rrjedhën e historisë së Kosovës. 

 

“Si përgjigje ndaj ciklit të dhunës që kishte marrë trajtë gjenocidi dhe politikave të regjimit të Millosheviqit ndaj shqiptarëve të Kosovës, 19 vende të NATO-s, të udhëhequra nga Shtetet e Bashkuara të Amerikës, nisën fushatën ajrore mbi caqet policore dhe ushtarake serbe për 78 ditë. Gjatë kësaj periudhe, ndërhyrja e NATO-s nga ajri dhe qëndresa e UÇK-së në terren u ndërthurën në një çast përcaktues për Kosovën.”, ka shkruar Haxhiu, duke shtuar se Kosova është përherë falënderuese për mbështetjen e miqve dhe aleatëve tanë ndërkombëtarë që nuk na lanë vetëm në momentet më të vështira. 

 

Kryetari i PDK-së, Bedri Hamza, 27-vjetorin e ndërhyrjes së NATO-s, e ka cilësuar si një moment vendimtar që ndali masakrat dhe krimet sistematike të regjimit të Sllobodan Millosheviqit ndaj popullit shqiptar. 

 

Ndërsa, kryetari i LDK-së, Lumir Abdixhiku, ka propozuar që 24 marsi të shënohet si datë kombëtare e Kosovës. Bombardimet e NATO-s nisën më 24 mars 1999 pas autoritetet e atëhershme serbe nën udhëheqjen e Sllobodan Millosheviq, refuzuan të nënshkruajnë Marrëveshjen e Rambujës. Bombardimet zgjatën 78 ditë dhe përfunduan me Marrëveshjen e Kumanovës, e cila parashihte largimin e forcave serbe, përkatësisht çlirimin e Kosovës.