Provimi i Jurisprudencës, Selami: Kërkuam harmonizim ligjor nga Qeveria

 

“Ligji për Përdorimin e Gjuhëve është miratuar në vitin 2019, pra ka shtatë vjet që është në fuqi. Me hapjen e iniciativës personale nga ana ime ne u drejtuam deri tek institucionet përkatëse, pra deri tek Ministria e Drejtësisë dhe tek Inspektorati i Gjuhëve dhe pas marrjes së përgjigjeve zyrtare nga ana e tyre konstatuam se në zgjedhjet aktuale ligjore që e rregullojnë këtë tematik, pra provimin e jurisprudencës, noterisë dhe provimin e përmbaruesve, nuk është paraparë mundësia që këto provime të jepen në një gjuhë tjetër nga Gjuha Maqedonase dhe konstatuam se kjo shkakton probleme juridike dhe praktike për kandidatët që gjuhë amtare e kanë gjuhën shqipe. Duke u nisur nga kjo dhe moszbatimi i Ligjit, u drejtuam me iniciativë konkrete për harmonizimin e këtyre ligjeve që të ketë implementim konkret dhe të detyrueshëm nga institucionet, pasi që e kemi parë se deri më tani ato nuk janë implementuar.”, - deklaroi avokati i popullit, Faton Selami.

 

Këto komente Selami i bëri me rastin e shpalosjes së Raportit vjetor për gjendjen e sigurimit, respektimit, realizimit dhe avancimit të të drejtave dhe lirive të njeriut për vitin 2025. Me këtë rast ai njoftoi se gjatë vitit 2025 institucioni i Avokatit të Popullit ka shqyrtuar 2.921 parashtresa. Numri më i madh i parashtresave ka të bëjë me mbrojtjen e të drejtave, ku kryeson fusha e jurisprudencës, pastaj fusha për mbrojtjen e konsumatorëve, marrëdhëniet e punës dhe mbrojtja e të drejtave të fëmijëve. Nuk kanë munguar ankesat edhe në fushën e urbanizmit dhe ndërtimit, fushën e konsumatorëve, parashtresa për faturat e larta, sigurimin invalidor dhe pensional, punën e përmbaruesve etj. Institucionet që nuk kanë aspak përparim janë institucionet ndëshkuese përmirësuese. Sa i përket lëndëve për dhunën familjare, Avokati i Popullit ka konstatuar lëshime në reagimin institucional, i cili, sipas tij, nuk është bërë në kohë.