Komisioni parlamentar për mundësi të barabarta mes grave dhe burrave

 

Iniciativa është paraqitur nga deputetet Zhaklina Peshevska dhe Monika Zajkova. Theksohet se kjo iniciativë paraqitet duke pasur parasysh nevojën që Kuvendi, përmes trupave të tij punues dhe në kuadër të funksionit mbikëqyrës, të sigurojë një pasqyrë më të detajuar mbi mënyrën se si institucionet kompetente i zbatojnë ligjet, politikat dhe mekanizmat për parandalimin dhe mbrojtjen nga dhuna në familje dhe dhuna ndaj grave, si një nga çështjet thelbësore që lidhen me të drejtat e njeriut, sigurinë, dinjitetin, mosdiskriminimin dhe mundësitë e barabarta.

 

– Dhuna në familje dhe dhuna ndaj grave nuk është vetëm çështje e reagimit të një institucioni të vetëm, por çështje e funksionalitetit të të gjithë sistemit, e koordinimit ndërinstitucional, e veprimit në kohë dhe efikas, e qasjes në shërbime dhe e ekzistencës së mekanizmave të qartë dhe të zbatueshëm për mbrojtje. Prandaj, nevoja për debat parlamentar për këtë çështje paraqet një kërkesë legjitime për një vlerësim sistemor të gjendjes, analizë të zbatimit të ligjeve dhe përcaktim nëse vendosja institucionale siguron apo do të sigurojë mbrojtje në kohë, të koordinuar dhe efektive, thuhet në Propozim-vendim.

 

Kjo iniciativë, siç theksohet, është vendosur ekskluzivisht në kuadër të funksionit mbikëqyrës të Kuvendit ndaj Qeverisë dhe organeve të administratës shtetërore, përkatësisht si një debat sistemor mbi zbatimin e ligjeve, politikave dhe masave institucionale nga organet e pushtetit ekzekutiv. Qëllimi është që Komisioni të marrë një pasqyrë të përgjithshme, të agreguar dhe institucionale mbi funksionimin e mekanizmave për parandalim dhe mbrojtje.

 

Në Propozim-vendim theksohet se nevoja për këtë debat mbikëqyrës buron nga disa aspekte kyçe:

 

– Së pari, çështja e parandalimit dhe mbrojtjes nga dhuna në familje dhe ndaj grave ka dimension të fortë publik, institucional dhe shoqëror. Efikasiteti i reagimit institucional vlerësohet jo vetëm nga ekzistenca e ligjeve, por nga zbatimi i tyre në praktikë, koordinimi ndërinstitucional, qasja në masa mbrojtëse dhe besimi i qytetarëve në sistem.

– Së dyti, kjo çështje lidhet drejtpërdrejt me mundësitë e barabarta. Çdo dobësi institucionale, mungesë koordinimi apo qasje e kufizuar në mbështetje ndikon drejtpërdrejt në mbrojtjen reale të personave në rrezik.

– Së treti, debati mbikëqyrës parlamentar është mekanizëm i përshtatshëm për të siguruar informacione dhe qëndrime nga institucionet kompetente, në mënyrë që Kuvendi të nxjerrë përfundime dhe, nëse është e nevojshme, të iniciojë përmirësime të mëtejshme ligjore dhe institucionale.

 

Qëllimi i kësaj seance, siç theksohet, është që Komisioni, mbi bazën e informatave dhe mendimeve profesionale, të krijojë një pasqyrë më të plotë për funksionimin e sistemit institucional dhe të propozojë përfundime dhe rekomandime për përmirësimin e tij.