Propozim-ligji për arsim të lartë, Sindikata e Pavarur Akademike prezanton vërejtjet

 

 

“Jemi të bindur se kushtet për zgjedhje në tituj duhet të përputhen me specifikat e fushave të ndryshme shkencore dhe artistike, duke siguruar njëkohësisht kushtet e nevojshme për arritjen e tyre. Në zgjidhjet e propozuara, këto kushte nuk janë të zbatueshme për fusha të ndryshme shkencore dhe janë të vështira për t’u arritur nga shkencëtarët e rinj, pa garanci për financim adekuat dhe kushte pune. Në vend të qëllimit të deklaruar rritjes së cilësisë, një qasje e tillë mund të ketë efekt të dëmshëm, siç është humbja e kuadrit të ri në universitete.”, thuhet në komunikatën e Sindikatës së Pavarur Akademike, duke shtuar më tej se në Ligjin për veprimtari kërkimore - shkencore nuk ekziston një përkushtim i vërtetë për financim të detyrueshëm, të vazhdueshëm, të parashikueshëm dhe strategjik të shkencës në vend. 

 

Ata presin nga MASh-i, si propozues i këtij ligji, të sigurojë kushte të realizueshme për zgjedhje në tituj, të cilat në disa aspekte i tejkalojnë edhe standardet që ekzistojnë në rajon. Përveç kërkesës që MASh-i të rihapë debatin për ligjet, nga sindikata thonë se i kanë dorëzuar ministrisë edhe një sërë të vërejtjeve edhe për autonominë universitare, financiare dhe kadrovike.

 

Sindikata vlerëson se projektligji cenon rëndë autonominë universitare, pasi lejon ndryshime në universitetet publike pa pëlqimin e tyre dhe pa kritere të qarta. Po ashtu, ata kundërshtojnë propozimin e deritanishëm që vendimmarrja për zhvillimin dhe investimet t’i kalojë Këshillit të Universiteteve, ku përfshihet edhe pushteti ekzekutiv, duke hapur rrugë për ndikim dhe presion politik.